葉劉淑儀 重修母女情

外表強悍的立法會議員、新民黨主席葉劉淑儀，剛踏入長者「兩蚊優惠」年齡，被影到申領長者卡和長者八達通，更表示好開心可以兩蚊周圍去，因為假日她常搭港鐵出街睇戲。葉太話以前覺得65歲好老，現在就不覺了，因為自己心境好正面，「最緊要身體健康，仲有日日工作令自己保持活力。」
葉太與26歲獨女葉榮欣（Cynthia）歐遊度過了65歲生日，自丈夫因病過身後，她肩負起單親媽媽的重責，獨力撫養女兒成材。今年，葉太獲慈善機構頒贈「模範母親」獎項，但她直言對此感到慚愧，因為在女兒眼中，她並非一位合格的媽媽。

母兼父職18載

1992年5月31日，葉太從這張舊照，回味當年的快樂時光：「女兒出生，與丈夫文浩的二人世界生活起了變化，家庭更美滿。他非常體諒我忙碌的工作，從來不介意寓工作於娛樂，經常帶同女兒，陪我出席各類型活動。」
好景不常，1997年丈夫葉文浩肝癌病逝，獨女Cynthia年僅八歲，葉太自此母兼父職，為女兒咬實牙關在政壇拼下去，
在香港主權移交前，升任入境處處長，是香港史上首位出掌紀律部門的女性。1998年，更成為香港首位女性保安局局長，事業達到首個高峰。直到2003年，葉太決定辭官赴美國進修東亞研究，三年後學成回港重投政壇，2008年從港島直選勝出成為立法會議員，四年後成功連任。2010年12月，葉太更創立新民黨，擔任黨主席至今，成為她從政以來另一個里程碑。

女兒既活躍又寂寞

葉太從政生涯歷盡高低起跌，返回家中湊女一樣困難重重，女兒每個成長階段均有不同難題，「我個女一出世性格就好似男孩子，比較百厭、奀皮、好動，唔可以停落嚟，不過聽講依家啲細路哥，普遍都比以前活躍。我記得有次同佢去溫哥華，11個鐘頭飛機佢冇瞓過覺，全程郁來郁去，所以湊佢都係比較辛苦。」
成為單親媽咪後，葉太為養家更落力工作，日間上班，夜晚應酬，回家還要看文件，與女兒的相處時間少之又少，令女兒常感到孤寂，童年玩伴是已故警務處處長許淇安所贈的兩頭退役警犬，葉太一直覺得愧對女兒，曾在個人facebook寫道：「女兒一直念念不忘小時候學習芭蕾舞時，因為我工作太忙，並未有貼身照顧及為她準備舞衣。回想起來，女兒成長階段中，我陪伴在她身邊的時間，不算太多。及後03年我離開政府赴美留學，有機會與她較長時間一起生活，共度美好時光，彌補她年幼時母親不在身邊的空白日子。」

渴望做平凡家長

Cynthia踏入青春期後開始反叛，讀書故意考得差，鍾意向老師駁嘴，葉太相信女兒是想引人注意，渴望得到關心，「我個女係好活躍嘅細路哥，
因為佢冇兄弟姊妹，所以佢喺香港學習比較attention seeking，即係想做啲嘢引人留意。」她相信要解決問題，需要轉換學校環境，「放佢去一個好多嘢做嘅學習環境，亦係小班教學，老師可以俾好多時間佢，就自然解決到attention seeking呢個毛病。」
葉太都知道問題所在，有時都想如普通家長般，出席學校活動支持女兒，不過一踏入校門又被人指指點點。「我一去佢學校，就俾人話我高調去佢學校，其實我一入校園就俾人話高調，我絕對唔係特登高調，我都係一個普通家長咁去啫，只不過我多人認識。」

赴美讀書開竅

2003年Cynthia 14歲那年，因《23條》民望急跌的葉太，決定辭官與女兒雙雙赴美讀書，修補母女關係，並重新思考自己未來的路向，更重要是終於令女兒重新愛上學習。「送佢去外國有一個好處，就係冇人理佢父母係邊個，去到一間中學或大學，佢只係眾多學生其中之一，所以佢唔會受到好多注視。另外就係校園環境多元化，印度人、泰國人、韓國人、日本人乜人都有，學習上可以與不同種族、不同文化嘅人相處。」
在美國的三年間，母女享受了久違的親子樂，
葉太亦可自由參加學校活動，做回平凡家長，「中學開放日我都會去，幫學校添置一啲食物，幫手運啲飲品我都有做過，喺外國我只係一個普通家長身份，變咗個女冇乜壓力。」

三年後，葉太返回香港重投政壇，Cynthia在彼邦繼續學業，成績理想，大學畢業於美國賓夕法尼亞大學的政治哲學系，現正就讀史丹福大學商科學院碩士課程。葉太公務繁忙，難以探望，但有陪女去開學，「因為入寄宿學校要添置好多家具，床單被鋪都要買，我個女喺美國冇車牌，我就去幫手車佢周圍購物，去超級市場買日常用品、床單被鋪，幫佢置家啦，呢啲作為家長係應該做嘅。」

翻新媽咪睡房賀壽

葉太去美國幫個女買被鋪，今年輪到個女買給她。每逢母親節、生日，Cynthia都會絞盡腦汁為媽媽越洋送上驚喜，今年她決定翻新媽媽的房間，令葉太感到很窩心。「呢方面我都要讚吓佢，可能女仔細心啲，即使佢功課好忙，佢都記住我幾時生日，成日都諗要送咩生日禮物俾我，終於今年佢諗到喇，佢話我間房啲被鋪都好陳舊，因為我太忙唔得閒管家，佢就話會幫我換晒全間房嘅家具、床單，佢走去好多工廈特賣場搵又平又靚嘅貨。」
Cynthia已返回美國繼續碩士課程，至於會否從政仍言之尚早，但從她修讀商科碩士的原因估計，都大有機會繼承母親衣缽，葉太解釋：「其實商科係管理學，佢大學主修政治科學，踏入社會好需要識吓財務、會計、管理，所以入讀商科學院就有全面訓練。我自己都喺商科學院讀過，咁我就話佢知現代社會、國際經濟係點樣，例如匯率係點決定、跨國公司點運作，或者香港冇嘅產業好似石油業、化工、藥廠點運作，你去商科學院讀吓係好有幫助。」

教女有方：搵好學校啟發興趣

女兒已經長大成人，有獨立思想，讀書見成績，母女關係更勝從前，葉太的教女心得是讓她自由發展，選取一間合適的好學校加以栽培。「我教女係好自由，我個女都話我係非典型母親，最緊要係放佢去一間好學校，啟發到佢嘅興趣，讀書最緊要有興趣。」
在香港傳統教育下，每日特多的功課量令學生厭倦讀書，如不改善會影響前途，葉太覺得一切皆由發掘興趣開始，「好似父母應該點教仔女睇書，都係要先令佢哋有興趣，好似依家好多電視翻拍童話故事，如果同細路哥講《白雪公主》，可能佢哋會覺得老土，但你叫佢哋睇新拍嘅《白雪公主》電影，睇完感到有興趣，你就可以拎本書同佢讀。所以我教個女讀書，無論英文定其他科目，都係確保啟發咗佢興趣先，佢就會自動產生求知慾。我覺得教細路哥點樣識主動求知好緊要，有興趣有求知慾後，佢就會自動自覺搵資料，其實今時今日互聯網上乜都搵到，新一代學習仲方便過我嗰個年代。」

葉太教英文
貴為香港大學英文系一級榮譽畢業生，兼有三個碩士學位的葉太，英語水平出名高，近年積極出版教英文書籍，提升年輕人英語水平，今年繼續有新作《Regina’s English Works for You》，輯錄她過往在英文報章的專欄，並分析外國文章中的措詞用字。葉太指要學好英語，多看書是基本，但隨着互聯網盛行，所用的語言都簡化了，所以更加要多看文章惡補，即使英語雜誌都好，例如旅遊、時裝都與生活息息相關，好容易明。而葉太在短片亦親身教英語，有個詞語夠生活化之餘，亦是葉太寄語給年青人，即刻去片學習一下！

●撰文：Ling
●攝影：Paul Choi(部分相片由受訪者提供)