華姐陳爽 懷孕進補食療

華姐陳爽 懷孕進補食療

1
已懷孕八個月的陳爽身形依然fit 爆,除了多吃花膠,還要多做孕婦瑜伽保持運動量,亦有利順產。

2007年國際中華小姐季軍陳爽(Sherry),當選後加入TVB拍劇和主持綜藝節目,最近期為《衝上雲霄II》飾演航空公司公關Rosa,現實中,她兼任香港航空營業及市場部企業銷售經理,一做三年。Sherry與丈夫梁梓軒(Anthony)結婚一年多後有喜,現陀B仔八個月。自懷孕後,她放棄了朝九晚五的工作,轉行做海味生意,有利自己養顏護胎之餘,亦可幫補奶粉錢,時間較彈性。臨近10月預產期,她日日進補,但身形完全沒走樣,秘訣就是多吃零脂肪抗衰老的花膠。

2
陳爽2012年尾下嫁金融才俊梁梓軒,一年後展開造人大計,不久即中獎。

想阿仔似爸爸聰明

組織一個三口之家,都是Sherry與Anthony的計劃之內,只是沒想過那麼快,Sherry說:「我哋結婚一周年去咗個trip,就有共識開始試下,點知即刻中咗,超乎我哋想像,心理上未完全ready,不過九個月懷孕期咁長,有時間俾我調整心理。」Sherry今胎懷男嬰,丈夫有少許失落,「佢話如果係女都幾好呀,囡囡係老公前世情人,所以男人都係鍾意女仔多啲啦,女仔會靚啲,哈哈。」Sherry希望囝囝似爸爸,尤其是性格方面,「佢好孝順,有自己主見,係一個好聰明嘅人,有咁樣嘅仔我都幾開心㗎。」兩夫婦皆是獨生,覺得成長沒大問題,不過都有打算為下一代添個伴,「睇吓囝囝有冇需要,如果下一個係女就最好啦。」懷孕至今,Sherry陀得幾舒服,頭三個月只嘔了兩次,食得瞓得,戒口都好少,身形也沒太大改變,Sherry解釋一得知有孕後,即做孕婦瑜伽,keep fit之道是多行樓梯及行街, 保持身體郁動,並到美容中心做人手推淋巴。她最感動是丈夫百忙中抽空為她按摩,消除雙腳水腫,「佢做iBank投資銀行,工作都好忙,但佢都盡量抽時間幫我煲湯,幫我拎粗重嘢,早排我對腳開始水腫,佢攞支body oil幫我按摩、推淋巴,佢嘅手法重咗啲嘅,痛到我叫,但係我覺得佢好有心,一個大男人幫我做呢啲嘢。」

4
今年四月Sherry在微博宣布有喜。

零脂肪花膠最抵食

海味是貴價品,未必人人食得起,食得起又驚太補受唔起,她特別推介花膠,價錢較平民,而且接近零脂肪,愛靚媽咪最啱,「豬手同雞腳都有膠原蛋白,但脂肪 高,食得多會肥,但花膠多吃都唔怕。我食緊非洲生曬鱸魚肚一斤12至14頭,唔係咁貴,大約2,000元一斤,質量好過花膠筒,大約20塊,主要用來煲 湯,如果每次煲湯擺3塊,都煲到7次。每斤愈多就愈細塊,價錢愈平;愈大塊價錢愈貴,有啲成塊面咁大,成5,000元一斤。」花膠含豐富蛋白質、膠質、多 種維生素及鈣、鋅、鐵、硒、磷等微量元素,滋陰養顏,對身體各部分皆有益。Sherry最常煲花膠燉烏雞,放一條細粟米、2至3個蜜棗、約30粒杞子、半 條紅蘿蔔,加3至4塊花膠,足夠五至六人飲,「花膠需要先用水泡浸,烏雞都要飛水,之後就可以擺晒所有材料一齊煲,約煲三個鐘就得。」

去一個月babymoon

Sherry和Anthony兩家人都對參茸海味認識深厚,她懷孕後決定離開任職三年航空公司,在參茸海味界打天下,主打網上零售,藉着慳舖租以較平價錢出售產品,親自揀貨包裝,訪問當日她挺着大肚都要送貨,開業初期凡事親力親為,成為她懷孕期間最大寄託。事業轉型,加上新生命的來臨,壓力都不少,Sherry懷孕五個月時,與丈夫和好姊妹朱璇到法國和西班牙旅行一個月,放自己一個babymoon,「好輕鬆,拋開晒所有工作,全程投入一個假期狀態,我覺得對BB好重要,一開始頭三個月要穩胎,中段時間可以做多啲嘢令自己開心,BB喺一個開心嘅環境下成長,都會生得大隻啲。」在歐洲她有留意BB物品,最大收穫在西班牙特賣場,「嗰度有好多BB衫,我都有掃貨。」

 

●撰文:Ling

●攝影:Clay Lam( 部分相片由受訪者提供)

更多精選內容