玩轉Peppa Pig遊樂場

復活節有咁多日假期，小朋友就最開心啦!

早幾日就帶Keicy 同 kassy去咗一個大型嘅室內遊樂場玩，一入到去佢哋就見到好多隻Peppa Pig公仔，就不停咁大叫：Peppa Pig！ Peppa Pig！仲攬住啲豬仔影咗好多相添！

現場有好多Game都可以俾小朋友發揮吓創意，其中一樣就係親手畫一張明信片，然後掉入現場設置嘅郵筒，就會寄返去你屋企。可能寄信對Keicy嚟講，始終有啲新奇，所以佢寄完之後，就成日問我：幾時先會寄到去屋企？係咪真係會收到？

你睇Keicy 同 kassy填顏色填得幾專心，佢哋幫Peppa Pig上好色，再寫埋自己個名，就將張畫紙交俾現場嘅哥哥姐姐，過咗冇耐，嗰幅畫就會顯示喺後面嗰個好大嘅LED mon度，呢個影相位，真係夠晒特別！

嗰日獎門人曾志偉都有去，Keicy仲好似小fans咁同佢影相！

今次活動嘅入場收益，仲會攞嚟做慈善，小朋友玩得開心之餘，又有意義，咁先係最緊要！