即製最強雨衣雨鞋


呢排成日落雨,有時仲無啦啦落得好大,就算有遮,遮得小朋友嚟自己都濕晒,咁啱大頭蝦冇雨衣喺身,好在車尾箱有大細膠袋同較剪,可以即刻變一件雨衣畀小朋友着!

而因為當時太趕急冇影相,所以返到屋企之後做多一次,同大家分享返!

首先喺大垃圾袋嘅兩邊各剪個窿仔做手位,再喺近頂部剪開少少,畀個頭捐出嚟,最後用剪開咗嘅頂位嚟做頂帽,只要修剪少少笠喺個頭度就得。

而兩隻腳仔,就用膠袋仔連鞋套住,再喺頂位綁靚靚嘅蝴蝶結,仲係 Kassy 好鍾意嘅粉紅色添!

因為小朋友平時係屋企停車場直接到學校門口或者商場停車場,所以唔係成日淋到雨,喺戶外都係短短一、兩分鐘,所以買咗嘅雨褸、雨鞋好少着,有啲仲未着過就已經唔啱着,所以決定以後唔再買雨衣,用個膠袋仔笠住,濕唔到身就 okay,況且 DIY 雨衣一定啱着,隨時有得用,唔駛成日換,仲平啲添!嘻嘻!

車外面好大雨嘅時候,Keicy 好窩心咁講:「媽媽揸車小心啲呀!」「好多車,好大雨呀!媽媽睇唔睇到路呀?」

識得不停關心我、問我,真係乖女!

之後佢又話:「咁大雨會唔會冧樓㗎?」仲成日問會唔會冧樓,我都唔知點解,可能學校而家教緊起樓同冧樓啦。

讀天主教學校嘅佢祈禱話:「我要同耶穌講,希望世界和平,唔想冧樓,我唔想有人受傷呀!」

媽媽都同 Keicy、Kassy 一樣唔想有人受傷,希望大家遇到大雨時都平平安安啦!

關鍵詞
雨衣雨鞋

更多精選內容

There are no comments

Add yours