港版童裝棉襖大花裙

今日黑雨唔駛返學,Keicy 話:「冇嘢做不如我哋整裙啦!」

當我諗緊要整咩裙嘅時候,突然醒起呢期畀網民惡搞,張馨予行康城影展紅地氈着嗰條傳統東北棉襖大花圖案拖尾裙。

神奇嘅係,唔知點解喺嫲嫲間房搵到類似嘅布!跟住再喺其他地方搵到一塊綠色布,不過係剩色,冇花花圖案嘅。

首先我處理塊紅色花花布,佢本身係一塊過好長,所以只剪少少出嚟做個領。

領位嘅做法係將塊布對摺,中間落條鐵線,用膠紙定位,再冚返埋佢,而個底就用釘落機皺起佢嚟釘,令領位有皺皺哋嘅效果。

下低嗰塊布就簡單啲,只係打直一塊過長方形,喺個身度圍一圍,喺背脊釘一釘佢,再加返頭先整好嗰個領,圍住個頭同頸就搞掂。

最後將塊綠色布,撓喺手臂度,好似披肩咁圍一圍就 okay 喇!

完成之後,Keicy 好搞笑咁話:「好似唱 “Let It Go” 嘅 Elsa 條披肩咁呀!」

有咗呢條披肩,Keicy 好開心,覺得自己變咗一個公主,仲係大紅花花公主!

圖像處理軟件「美圖秀秀」,亦都推出咗多款棉襖大花圖案,成為一眾網民嘅「萬能 key」!


我都加咗落去 Keicy 手臂條綠色布度,好好玩呀!嘻嘻!Key 得靚唔靚呢?

我認為呢條裙幾 okay,設計師胡社光平平哋買疋布,就成為焦點話題,無論正評抑或負評,都有好大嘅 noise。

其實 fashion 嘅嘢真係各花入各眼,而喺美圖秀秀加咗呢個圖案畀大家玩之後,就無端端帶起咗熱潮,真係估佢唔到呀!

更估唔到嘅係,突然喺衣櫃,搵到呢件爺爺嫲嫲多年前去中國旅行嘅時候買嘅衫,睇真啲原來同今朝做嗰條裙好似樣,好搞笑呀!:)

更多精選內容

There are no comments

Add yours