潮玩兒童 Salon

之前好少帶小朋友去 salon 剪頭髮，因為驚佢哋唔肯坐定定，搞到 stylist 剪唔到，又驚去到人多要等嘅時候，小朋友會唔耐煩、唔聽話，搞到自己心都煩埋，不過而家唔怕喇！

因為我去咗一間拍得住主題樂園咁好玩嘅兒童 salon，唔止有木馬、砵砵車同韆鞦坐，仲有成幅牆咁多嘅益智圖書任睇，啲哥哥姐姐仲好好人添！

細佬 Gaspar 一見到架鮮紅色砵砵車，就即刻好興奮咁話要坐上去，仲玩得好開心，一直唔肯落地，我心諗：「咁就啱喇！」，於是即刻加埋個「無敵奶咀」，令佢坐定定，聽晒 stylist 哥哥話，好快就幫 Gaspar 剪好一個型仔 look 喇！

家姐 Keicy 就淡定啲，慢慢坐上一隻典雅白色木馬，冇幾耐就發現牆身有好多佢好鍾意睇嘅益智兒童圖書。

原本以為 stylist 哥哥會問我想幫 Keicy 點剪，但估唔到佢直接去問 Keicy，而最估唔到嘅係，Keicy 竟然答佢：「我想留長，所以我想剪少少攣少少。」
我心諗：「嘩！阿女你真係好貪靚，似足我呀！」嘻嘻！

突然聽到 Keicy 大叫：「嘩！好靚呀！」
原來佢見到一件好可愛嘅淺藍色斑點狗圍袍，跟住，着咗靚靚圍袍嘅 Keicy 就坐定定喺個韆鞦上高，好開心咁剪頭髮。

完成喇！電攣咗之後 layer 多咗又靚咗，咁啱呢日着住條裙仔去，成個小公主咁呀！

見到 Gaspar 笑晒就知道佢好滿意啦！呢個髮型仲好襯佢面型添！

真係冇諗過剪頭髮都可以咁樂而忘返！下次再去呢度剪頭髮！^^

FB: KeicyKK