三姐弟一齊做建築師

Keicy 最近鍾意睇一套卡通,叫《Bob The Builder》,係講建築起樓嘅,咁啱一個商場邀請我同仔女去試玩相關嘅遊戲,真係太好喇!最初以為 Keicy 同 Kassy 只係鍾意玩公主類嘅嘢,原來中性啲遊戲都一樣玩得好興奮同好開心!

Keicy 一見倒兩層樓高嘅巨無霸瀡滑梯,就好 high 咁話要即刻玩,而 Kassy 玩完之後都話好刺激,不過開頭有少少驚,好彩有姐姐鼓勵,瀡多幾次就唔再怕喇!

其中一個遊戲係叫「定樁大力鎚」,好似打樁咁,拎起個鎚仔,dup 落一個喺地下嘅裝置,夠大力,最頂個鐘會好響,喻意打穩基礎好重要。Keicy 用盡全力搬起個鎚仔 dup 落去,都係唔夠力上到最頂,唔可以令個鐘最響,不過我都好高興見到 Keicy 對每個遊戲都好認真,好盡力咁去嘗試,抵讚!

另一個最深刻係全球獨家嘅觸控式夾禮物機,因為 Keicy 唔止好似《Bob The Builder》嘅角色咁玩「吊臂」,仲好犀利咁靠自己夾咗一份禮物!

除此之外,仲有美國最新研發,探索地質嘅虛擬實境體感遊戲,小朋友喺沙堆砌出唔同形狀,經感應器掃瞄後,系統同步將山脈等地形資訊,投射喺沙堆上高,掘到深層仲會出現流水至形成河流同湖泊。有得玩又令小朋友學到嘢,係好好嘅教育遊戲!

初初見到咁多波波,仲以為有波波池玩,原來係兒童機動挖泥機,Keicy 同 Kassy 真係好似大人咁操控槓桿轉向、伸縮、升降,以鐵鏟筆起啲波波,放喺指定位置。 呢個遊戲幾考小朋友嘅手部大小肌肉,係咪夠靈巧,所以我認為更啱大少少嘅小朋友玩,仲要有大人陪住。

兩位家姐周圍試周圍玩,細佬 Par Par 就獨沽一味,玩咗好耐「工程車」彈彈床,因為佢係第一次玩 bouncing castle,所以玩咗成個鐘都唔肯走,出咗嚟都要再爬返入去,哈哈!

今次 3 姐弟都玩得好開心,除咗玩得開心,仲訓練佢哋透過身體感覺嚟思考,學習地理、數學同工程知識,知道我哋嘅安樂窩,係由專業嘅建築工人努力興建而成,咁有意義嘅親子活動,大家今個暑假唔好錯過呀!:)

FB: KeicyKK

更多精選內容

There are no comments

Add yours