德望學校 60 周年

上星期六參加德望學校喺亞洲國際博覽館舉行嘅 60 周年晚宴,場館唔止寬敞,仲佈置得好靚,沿住走廊有好多唔同嘅 backdrop、紙牌、人型牌同發光擺設,更可以畫心意咭釘喺幅牆度,真係好有心思呀!

另外亦都見到印有德望字樣嘅絲巾,同手工製作嘅飾物。

當晚嘅司儀係兩位港姐朱凱婷(Heidi)同張敬仁(Kendy),兩位都係又靚又叻嘅德望舊生!

台上更有合唱團表演,亦播放過去十幾個月學校慶祝 60 周年所舉辦嘅活動片段,一眾 Sisters 同校長都好開心!

當晚最深印象係 Sister Pauline,佢一聽倒音樂,就即刻拖住大家隻手輕輕咁揈吓,而我同佢相認,話我係校友嘅時候,佢畀一個大力嘅擁抱我,好溫柔咁同我講: ”welcome home!” ,跟住我話佢知,嚟緊我個細女都會一齊喺德望呢個大家庭成長,讀書…… 嗰種感覺好奇妙,之前未試過,唔識點樣形容,只係知道嗰一刻好窩心、好 warm、好 sweet!

能夠同自己兩個女 Keicy、Kassy 一齊出席呢個晚宴,真係好開心,好感動,我大個咗返嚟可以參加母校嘅活動已經非常榮幸,Keicy 即將喺德望升讀 K3,Kassy 亦都即將入讀德望嘅 K1,兩個女可以同我一齊接受咁好嘅教育,真係好感動!因為德望嘅校長、Sisters、同學校所有嘢都好好!

原來學校係有舊生會,我一聽到就即刻加入 ,希望嚟緊可以多啲返學校幫手,而喺 11 月就有一個舊生會活動,需要都係就讀德望嘅媽媽同女女,做一啲親子活動同幫手籌辦執行,舊生會希望藉住呢個活動畀更多人認識,吸引更多舊生加入,為母校付出一分力量,令更多人感受到我哋學校有幾好,以及有幾團結。

呢一次晚宴就充分感受到舊生非常團結,花咗唔少心機、時間同心血將場館佈置得美輪美奐,舊生會嘅朋友話,平時學校嘅活動都好需要支持同幫手,所以希望有更多人加入佢哋,我聽完之後有啲感觸,雖然離開咗咁耐,但仲可以為學校出一分力,覺得好榮幸同好開心!

喺度再一次祝賀德望學校創立 60 周年,祝德望學校嘅校長、Sisters 同全體師生身體健康!事事順利!
FB: KeicyKK

更多精選內容

There are no comments

Add yours