30 分鐘速成 Minions 裙仔 $100 有找

專欄

廣告

Getting ready for Minions!

今期 Minions 因為電影上畫而成為大熱,連 Keicy 都話想去睇,相信大家都知道,小朋友去睇親呢類卡通都要有 dress code, 例如睇《Frozen》就要扮 Anna 同 Elsa, ,不過我喺坊間見唔到有 Minions 嘅裙賣,唯有自己 DIY 一條畀 Keicy 着!另外千嬅姐姐戴咗個由名設計師 Piers Atkinson 設計嘅 Minions 萌爆頭飾!我哋都 DIY 返個扮萌先!千嬅嗰個差唔多成$6000,Keicy 呢個連工包料都只係 $20!用咗 10 分鐘就完成喇!嘻嘻…

首先我準備咗啲黃色嘅線網,跟住喺入面加咗個里,令佢唔好咁透同埋刮身,另外有一條過頸嘅黃色絲帶。

而下身嘅藍色紗,就會穿入去再勾返出嚟,打個結,定係度,就變咗條紗紗裙喇!

而 Minions 嘅眼耳口鼻就係用絨布整嘅,3蚊一塊好抵買,總共買咗兩塊,分別係黑色同白色,加埋只需 6 蚊,用嚟做心口個圖案。

跟住我用咗個圓形嘅奶粉罐「給」住絨布,畫好個圓形,沿住啲線剪返出嚟。

再用筆喺絨布上高畫個口同啲牙,剪出嚟,黐返上去就得。

而楊千嬅戴嗰個頭箍,原價係港幣 6,000 蚊,不過我整嘅呢個好平,因為我攞咗個舊黑色頭箍、一塊黑色網,同哥哥姐姐送畀 Keicy 嘅細細隻 Minions。

首先用將頭箍穿過一格格嘅網窿,跟住用熱溶膠槍將公仔黐喺個頭箍上高,只要三至五分鐘就做起呢個「楊千嬅頭箍」喇!咁啱屋企有啲藍色粒粒,加埋喺頭箍上面做裝飾。

至於個圓型眼鏡仲簡單,我攞咗屋企玩開嘅一副圓形膠眼鏡,跟用攞卷攞錫紙,剪開一條條長方形,好似摺星星紙咁樣,再圍住個鏡框就整好,前後唔駛兩分鐘搞掂!

所有嘢加埋條裙唔駛三十分鐘就整好喇!係咪好靚呢?^^

後記:

因為Kassy都話好鍾意都想要,所以我下星期會去買材料,再整過另一個款 Minions 嘅裙畀佢。

成條裙連配飾 100 蚊都唔駛,半個鐘內整好,真係花少少心思就整倒,最重要係好慳錢!因為喺舖頭買一條公主裙要幾百蚊,小朋友大得快,着得幾次唔係唔啱着就係唔中意,所以呢個親子玩意真係幾有意義,幾開心,又唔會同人撞衫,大家都試吓整吖!^^

FB: KeicyKK