與明星們「談心」

早前一個網上節目《講乜靈嘢》錄影,主持嘅係黎瑞恩、劉小慧、李國祥,以及美國NGH國際認可催眠師藍公子。Keicy 都有去探班呀!唔止成個過程好開心,仲可以優先睇晒成個節目添!期待咗好耐,而家終於推出喇!

呢個節目係講心靈上嘅喜怒哀樂,不過係用好開心、正面嘅方式去探討,成個節目好似一班朋友傾計吹水咁樣,睇佢哋嘅預告,位位都笑得咁開心,就知道唔似其他同類節目咁超級正經,唔會睇到人好悶、唔開心。

其中講到一位媽媽因為囡囡車禍過身,唔開心咗幾年,成日都收埋自己,而催眠就能夠幫佢走出唔開心嘅情緒,當幾位主持講緊呢件事嘅時候,喺旁邊聽緊嘅Keicy 即刻攬住我,原來佢聽到眼濕濕,仲話:「嗰個媽媽好慘呀!冇咗個囡……」,跟住即刻問我:「我係咪你嘅寶貝?你係我嘅寶貝嚟呀!大家要珍惜大家呀知唔知?」

我聽到即刻攬住佢,不斷點頭,呢一刻 「無聲勝有聲」真係好感動,之前仲以為Keicy未必明白催眠呢類比較深奧嘅話題,不過原來而家嘅小朋友細細個就好叻,仲有自己嘅感受,所以大人可以同小朋友一齊睇呢個節目,相信睇完之後會更加珍惜大家,因為而家好多小朋友,都以為爹哋媽咪一定會喺自己身邊,所以呢個故事會令觀眾更加珍惜屋企人。

當我仲諗緊點樣平復 Keicy 情緒嘅時候,一班主持已經將氣氛變得輕鬆返, 所以 Keicy 好快就冇事,好開心咁繼續聽落去,所以睇呢個節目嘅家長係零負擔,輕輕鬆鬆咁睇就得喇!

另外,節目又講到喺一個 camp 裡面,所有人都要唔講嘢 7-12 日,咁做係要令你自己清醒吓。其實我自己都試過一日唔講嘢,原來真係好辛苦㗎!大家又不妨諗吓,如果十幾日唔講嘢,時間點樣打發?生活又點過呢?點樣可以幫倒自己?打坐?冥想?除咗過程得意之餘,原來仲有好多好處,想知道嘅話大家可以去睇吓,一定可以得到正能量!

呢個節目喺 7 月 22 日首播,大家要密切留意喇!
YouTube:https://goo.gl/SwhMCb
FB:https://goo.gl/sDX7iu

FB: KeicyKK

更多精選內容

There are no comments

Add yours