冰河世紀 LIVE!

今晚好開心可以去睇「冰上動感冰河世紀 LIVE!香港站長毛象大冒險」嘅首場表演!

最開心係可以同好朋友劉小慧一家齊齊入場睇 show,令 Keicy、Kassy 有得同一班朋友仔好興奮咁笑、叫、同影相!^^

入場前仲見倒為呢個 show 做廣東話配音嘅明星們,包括蘇志威、李璨琛、應昌佑、梁漢文、鄭欣宜,以及專誠嚟睇呢個 show 嘅洪天明、吳家樂、小肥同錢小豪,真係星光熠熠呀!

呢個 show 真係好好睇,有得睇晒咁多個 character,佢哋啲身手真係超犀利,有好似體操選手咁樣跳前空翻同後空翻,另外,溜冰技術亦都好好,再加埋出色嘅製作,令在場所有小朋友都睇得好 high!當啲 character 一行近啲,小朋友就想去同佢哋握手,或者攬吓佢哋。

而主辦單位亦都好細心,特設類似香港演唱會嘅「握手位」,令觀眾更加開心!所有 character 仲喺散場之後出返嚟,同大家影相,小朋友當然好興奮啦!Keicy同 Kassy 仲圍住佢哋一齊玩,不斷 say hello 同握手,最後仲唔捨得走……

全場 show 冇冷場,舞台、燈光、聲效都好出色,當然唔少得好重要嘅廣東話配音啦!幾位明星都配得好好,入形入格,令觀眾睇得勁投入,相信佢哋配嘅時候都係好開心!:)

FB: KeicyKK

更多精選內容

There are no comments

Add yours