賀!德望學校英文科老師獲獎

恭喜德望學校嘅五位老師,獲得行政長官卓越教學獎(英國語文教育學習領域),佢哋包括:陸家欣、DRYSDALE, Matthew James、何健齡、TOONG, Kevin Michael 及黃曉晴。

五位老師成功將英國語文、英國文學同話劇結合,提升學生學習英文嘅興趣,令學生英語水平明顯提升,喺舊年文憑試英文科就有八成同學獲五級或以上,老師更鼓勵學生參加演講及辯論比賽等,提升英語能力。

身為德望舊生嘅我真係非常高興,德望一直以嚟都非常重視教學質素,特別係英文科,諗返當年我最印象嘅係有英文老師介紹我睇電視劇 Pride and Prejudice (傲慢與偏見),呢套高質素電視劇,成功提高我對英文嘅興趣,因為我聽老師話用紙張遮住字幕,迫自己聽英文,之後我同呢位老師更喺課餘時間討論劇情。^^

睇咗一排之後,我嘅英文聽力提高咗好多,仲去圖書館借 Pride and Prejudice 嘅小說睇,從此就對英文產生興趣,之後上英文堂時都好比心機,學習得更好,現時我嘅英文唔太失禮,真係要多謝德望嘅英文老師。

我兩個女 Keicy 同 Kassy 而家都係就讀德望,佢哋嘅英文都好好,所以身為家長嘅我都好放心,亦都好慶幸兩個女都喺德望接受優質教育,因為有唔同種類嘅課外活動,包括「一人一樂器」、多項運動項目及普通話表演藝術學會,可以提升佢哋嘅自信同溝通能力,發展潛能。

到大個少少仲有其他活動幫佢哋進行生涯規劃,確立人生方向,令佢哋長大成人之後,會成為有學識、有品德、能夠服務社會嘅人。

喺度再一次恭喜得獎嘅五位英文老師!實至名歸!

(部分相片來自互聯網)

FB: KeicyKK

更多精選內容

There are no comments

Add yours