正面應對食人電梯事件

今日同幾位好朋友食飯嘅時候,傾到最近連續有幾單扶手電梯意外,其中一單係喺湖北,一位媽媽被捲入扶手梯嘅時候,用力將佢年幼嘅囝囝托出,囝囝最後雖然安全冇事,不過可惜媽媽就過咗身。

身為媽媽嘅我,睇到呢單新聞都好唔開心,仲幻想萬一咁唔好彩,遇到類似情況 (touchwood),就會好弊,同樣做人媽媽嘅劉小慧同黎瑞恩聽完都好心噏,不過催眠師藍公子就勸我哋唔駛咁唔開心,仲分享咗少少催眠心理學嘅知識,安慰返我哋。

其實,呢件事可以換一個正面啲嘅角度嚟睇,雖然媽媽犧牲咗,係一件好傷感嘅事,不過佢拯救咗一個幼小嘅生命,媽媽用盡佢最後一口氣將囝囝托出,係表現出人性嘅光輝,所以我哋係應該畀更多嘅正能量呢位小朋友,度過呢次慘劇,我哋可以用各種方法,付出更加多嘅愛,嚟話畀呢位不幸喪母嘅囝囝知道,佢以後嘅人生可以活得好好,咁樣佢就會為咗媽媽而更加珍惜生命,更加爭氣咁樣去做人。

呢幾日好多人都講 「個媽媽好慘!」、「搭扶手電梯要小心啲呀!」,甚至大罵「點解冇人 check 住呀!」等等,睇完呢啲消息或者資訊會情緒低落。

其實大家都講得好啱,因為咁樣可以令大家提高警覺,會有更多人檢查扶手電梯,減少傷亡,不過件事唔係鬧完講完就算,我哋應該着眼喺點樣幫嗰位小朋友度過陰霾,因為佢以後要背負住媽媽嘅犧牲去做人,無論喺屋企、學校、社區甚至將來踏入社會,呢件事都會跟足佢一世。

我哋同佢身邊嘅人,要做乜嘢幫佢適時減壓呢?點樣教導佢,可以令佢正面、積極咁面對人生呢?呢啲先係最重要,因為幫小朋友撫平創傷,重建信心,過返正常生活,係遠比整好扶手電梯複雜同艱鉅。

正所謂「人生不如意事十常八九」,無論你係富或貧,都一定會遇到唔開心嘅事。而喺呢件事入面,相信認識死者嘅大人都好難受,相信要花一段時間同心力,先有機會調節好心態,重過正常生活,更何況係天真無邪、咩都唔識嘅小朋友呢?所以呢件事令我知道,如果有不幸嘅事發生咗,身為大人嘅我哋,一定要注意小朋友嘅情緒,要用盡一切辦法幫佢哋走出陰霾,令佢哋可以健康快樂咁成長。

好多電影橋段都話屋企人過咗身,可以搵問米婆通靈,咁究竟催眠同問米有咩分別呢?邊樣幫到死者家屬更多呢?唔駛去問米,最新一集《講乜靈嘢》有精彩分享:https://goo.gl/1lvmlC

FB:KeicyKK

更多精選內容

There are no comments

Add yours