樂遊藝術空間

專欄

廣告

 

噚日天氣好好,涼涼哋,最啱就係去戶外玩吓!

所以帶咗 Kassy 同 Par Par 去咗 PMQ 嘅「樂遊 deTour 2015」

Keicy 因為要準備學校 60 周年嘅表演,所以今次就同 Kassy、Par Par 三人行!^^

`

`

【想食棉花糖?跑步先!】

一入場就見到「筋斗Run」,顧名思義,係要跑嘅。

喺呢部機器上高跑得越快,越努力,就會整出越多棉花糖。

Kassy 知道之後就同我講:「媽咪,我哋一定要跑快啲呀!」

阿囡叫到,媽媽一定使命必達!

不過,平時少運動嘅我,跑完都有啲嗦氣……

細細粒嘅 Kassy,當然跑得辛苦啦。

不過努力跑完之後有棉花糖食,係開心嘅!^^

`

`

【喂喂喂,搵邊位?】

喺 photo booth 好興奮咁又跑又跳影完相後,

去咗好多喇叭位嘅「城.響」。

除咗聽到好好聽嘅音樂,仲可以玩「傳聲筒」,

即係喺一邊講嘢,另一邊就會聽倒聲。

最得意嘅係,一抱起 Kassy 對準個喇叭,

佢就當電話咁用:「喂,搵邊位?」:P

 

`

 

`

【顏色激發創意】

Kassy 同 Par Par 大愛可以任意塗鴉嘅牆,喺嗰度畫畫唔使畀人鬧!

見佢哋未夠喉,就同佢哋再喺環保袋上高油顏色。

而家,佢哋可以同屬於自己嘅環保袋一齊行街街喇!^^

另外,我同 Kassy 做咗個親子藝術實驗。

將一個杯裡面嘅顏料,用飲筒吹起啲bubble,印喺張紙度,變成一幅畫。

之後我哋參觀「雲圖景像」,裡面環境接近全黑,好有神秘感。

啲雲唔止靚,拍吓機器更會變色,Kassy 同 Par Par 都玩得好開心!

`

 

`

【DIY Print tote bag】

 

Kassy 平時喺屋企成日油顏色,今次印圖案落 tote bag,係佢嘅初體驗。

首先揀自己鍾意嘅顏色,再揀圖案個模。

跟住攞個掃,掃顏色上去,就完成喇!

 

`

`

【後記】

呢個活動對 Kassy 同媽媽都好新鮮!

食棉花糖前要跑步,攞環保袋先要畫畫,

落手落腳去做去玩,又滿足又開心!

其中一個開心位,當然係玩到攰可以食麵同西多啦!嘻嘻!

而呢個活動最重要係,

小朋友可以透過遊戲同活動,

去體驗、接觸同了解本地以及國際前衛嘅藝術設計,

培養小朋友嘅創意。

`

PMQ 更係本地設計師其中一個集中地,

可以搵到佢哋精心設計嘅衣物、藝術品同手飾,

係一個大人細路都啱去、值得去嘅地方。

`

FB: KeicyKK

關鍵詞
deTour2015PMQ