4歲生日純影集


眨下眼就4歲,真係越黎越有一種好唔捨得佢長大既感覺!依家呢個小朋友每日都會好主動攬住我同爸爸,成日同我哋講:「我好鍚你、好愛你、好掛住你同埋好攬你!」跟住九秒九“啜”埋黎,我哋就梗係冧喇!不過就感覺到呢D日子真係唔會好長久,因為佢只會越黎越大個仔,所以要珍惜!前兩日係佢生日,果日佢週圍同人講:「我今日生日呀,4歲呀!」,不論係看更叔叔、坐係公園既婆婆、餐廳職員等都絕不放過!由於佢成日都好有禮貎咁叫人,所以我哋住果度附近既叔叔姨姨都好認得佢,而佢咁同人哋講自己生日,我哋就係後面睇到哭笑不得!

係佢讀小學之前,我都希望可以盡力幫佢影一緝有代表性既生日相留念!其實今年本來個IDEA係影一緝戶外相,但當然幻想是美好,現實係殘酷既!其實我自己教攝影,又點會唔知道,幫小朋友影相係唔迫得?因為我知道佢依家唔鐘意被影,但我都盡我最大努力,去做好準備先!首先要搵件生日衫其實係幾難既事,所以本身都諗住DIY,剛巧朋友介紹一間公司是幫人用碎布或舊布車嘢,我就打去問下如果我提供一件純色衫,可否幫我車D有代表性既嘢上去,店主很好,好快給我DESIGN,因為我急用,過兩日開快車整比我影相用!好靚呀!而個4字波波早一個星期前已經買咗,剛巧係我公司附近有一間樓上舖有得賣,一星期後走咗少少氣上返去搵姐姐充返少少氣又可以繼續用!真好!

好可惜!天氣實在太熱,唔係話係小朋友,大人都頂唔順,於是我哋只可以係STUDIO影少少,跟住貪心既我唔理咁多,係好熱既情況底下,去唔到公園係條街影幾張都好過無!但係影既過程絕唔係你哋所見既咁順利!首先係STUDIO既時候可能因為係阿仔主場,再上一個星期咁橋約到幾個同學仔上黎玩足球,咁我就順便幫佢攪個SURPRISE PARTY,完全無人知,得我一個知!呢個仔唔單只眼瞓會鬧情緒,依家乜都要第一,所以攪到氣氛有D尷尬!睇張相就知 XD

所以大合照呢D嘢都好睇彩數!不過呢!對我黎講,呢D都係一D好有趣既時刻,到佢大個睇返,佢就知道自己當時係點!而我,都係較喜歡唔望鏡既SNAP多D,感覺溫馨D!


由於好朋友同阿仔只係隔十一日生日,所以我都想約埋一齊影,一來有互動,二來開心D!到咗正式約好好朋友一齊影生日相當日,其實我都有心理準備,佢未必會合作,果然!上到黎開頭沒問題的!一切都好順利!


但當影到要用蛋糕,呢個小朋友竟然同我講:「我都未生日!」(無錯!係第日先係!天呀!點解會咁架?)其實我真係未試過佢咁答,我真係黎唔切反應!所以呢!我真係唔想迫佢,所以我話唔影!但佢又話唔好唔影,攪完一輪,大家都估唔到,最後竟然係我喊咗出黎!因為真係幻想得太美好,所以呢,心情都會影響影相!老實講,我真係好怕迫小朋友影相,雖然我準備晒,但我都選擇令願唔繼續影,因為影出黎只價係咁樣!

後來大家冷靜過後,我提議不如出去影幾張算,因為有個氣球,相信出到外面佢哋會開心D!可惜,天色突然轉黑,想落雨,唯有快快手影幾張就走!所以今年只能做到咁多!今年真係好難忘!希望下年會順利D!哈哈!再接再厲!要影靚相,一定要堅持同埋做好準備!:D


更多精選內容

There are no comments

Add yours