親子情緒管理活動

記得13週前9月既時候,係我處於最掙扎既時間,事原10月尾舊studio就完租,要好好咁計劃將來而又要顧及好多嘢,要作出重要既決定就係Go or not go…因為由頭到尾所有公司至家裡的大小事務都係主要由我自己處理,令自己變得好大壓力好容易煩燥,記得我就係9月某日爆發咗出黎,又唔覺意發洩咗自己情緒係個仔身上,佢一發脾氣,我比佢發得仲大倍數,嚇到佢好驚。其實已經唔係第一次,以前都試過,我之前收科既時候就同佢講果個係「恐佈媽媽」,「恐佈媽媽」係係你好曵既時候先會出現,所以你乖就唔會。

雖然只係試過一兩次,可惜我覺得已經足夠令阿仔心靈受害。於是,我平心靜氣同自己講,點樣都要搵出一個解決方法,要控制兩者之間既情緒,方法就係買咗呢塊白板,其實原理同貼紙類似,我真係用咗差不多三個月(之前唔知要幾耐先成功)去完成呢篇Blog,就係因為今日係我不知情既時候見到一個畫面,所以我覺得係時候係度分享下,因為開始果一刻都係諗住乜嘢方法都要試下,但我估唔到,呢個方法,都幾Work。

初初買返黎,就畫好我同佢個名,分開星期一至六上午同下午,星期日放假,一來唔夠位,二來係因為星期日多數係開心既日子,所以無咗呢日,當比大家放下假,哈哈!我哋記錄方法好簡單,無發脾氣,開開心心的,那就可以畫哈哈笑,如果係發脾氣,咁就係畫唔開心。WEEK1頭兩日係比佢試畫,星期三果日真係發脾氣,兩個都有,所以就要畫唔開心。因為阿仔唔鐘意畫唔開心,所以我教佢每次如果佢諗起如果自己發脾氣就要畫唔開心,就要忍住,諗下第二樣嘢,唔好令自己發脾氣。

雖然佢WEEK2換下個表達方法,但其實一睇都知呢個星期我哋係過得好開心。

WEEK3,有個小朋友係星期五上校車前忍唔到發脾氣,所以畫咗個唔開心。

其間,大致上佢都掌握咗情緒管理呢樣嘢,而我哋都每週都KEEP住咁樣做,剛過去的WEEK12成果如下:

已經演變到有多剔,佢話表示做得好好,但當然都仲有機會唔開心,因為發脾氣真係好難忍,哈哈!
但,今日(20141124)我最期待的畫面出現了!我哋竟然有好多個剔!而且佢真係做得好好,真係能夠保持愉快既心情。雖然唔知道會唔會可以係其他小朋友身上都能夠成功,但只少我個幾有性格既Shaun Shaun暫時能夠通過呢個活動控制到自己情緒,4歲4個月既小朋友能夠做到咁,呢樣亦都係同樣警剔我自己唔好亂發脾氣既活動,所以我點樣都希望繼續KEEP到。:)

更多精選內容

There are no comments

Add yours