東京親子遊第2天﹣Thomasland@富士急

本應老公話唔去Thomasland 。(當時情景)老公:「山長水遠!又好似唔係咁多嘢玩,去乜鬼?」我:「咁難得同阿仔去東京咁多日,而佢又咁鐘意,點解唔去呢?」老公:「我有分數喇!」我心裡:「*$#(%#*&%#*$&%*#&%*!!!)

 

點解我咁緊張?咪就係因為我知道有個方法去會順路同經濟啲麻!佢咁堅持,我都以為我哋唔會有得去!點知,全無期望之下,佢竟然第一晚瞓前話聽日去 Thomasland,但叫我哋唔洗特別早起⋯於是我哋果日8點左右起身,9點50分先係JR站出發,我哋去既方法係由大崎坐JR到新宿,15﹣20分鐘就到咗新宿,然後轉乘JR中央本線到大月站(10:20分上車)。

 

特急(EXPRESS)就要60分鐘,但我哋無坐特急,所以最後12:00先到大月站再轉乘富士急線至富士急樂園,最後又再坐50分鐘,12:50終於到達!由起程計足足三個鐘!雖然係咁,好彩阿仔鐘意坐火車,每架火車外影都唔同,而沿途景色怡人,仲可以睇到靚靚富士山!(記得我個日本人朋友話,係幸運既人先可以遇見整個富士山,今次又再見到!真幸運!)雖然唔係咁符合經濟效益,但佢坐得好開心,同埋最後都玩得好盡慶,乜都抵返晒!

 

其實有另一個方法去樂園,可以於富士急遊樂場既網址預早購買於新宿坐來回高速巴士,由新宿到富士急大約1小時40分鐘,而且呢個套票係包埋入場券,我無刻意計過我哋咁樣去抵啲定係套票抵啲,但感覺上好似直接啲去到同埋慳咗好多時間。但如果想好似我哋咁漫遊東京,我覺得坐火車都幾好玩!所以如果你哋第時有機會去,就自己度度,邊個方法方便自己喇!(參考網址:http://www.fujiq.jp/cn/qpack/)

 

另外都仲有其他方法,有啲仲可以坐Thomas火車,不過呢啲方法就要夾時間,所以絕對係唔會啱我哋既:D:D:D 不過你哋可以參考下呢個網址:http://www.fujiq.jp/thomas/access/index.html

 

*以下係由出發開始順次序既相片分享*

另一樣嘢要留意就係樂園開放時間,夏天就上午9點至下午5點,冬天就上午10點至下午5點,佢哋唔似我哋香港玩埋夜晚,佢哋係下午5點就關門,所以點解我想早啲去到就係咁解!好驚唔夠時間玩!

 

下頁:4小時點樣玩

究竟餘下4個小時,我哋又點反轉呢個Thomasland呢?突然好似精打細算咗既爸爸決定只有阿仔一個買全套票(2600YEN連入場及任玩Thomasland的機動遊戲)而我哋就買普通純入場的票1260YEN,因為玩果個係佢,我諗我哋都唔會玩,點知⋯果度所有機動遊戲注意事項其中一項係未達105cm(佢剛剛[email protected][email protected])既小朋友係要有大人陪同,所以我哋最後每陪玩一個遊戲就額外再比200或300YEN,呢啲計數嘢太煩,所以留待大家自己去計下點玩抵啲喇!嘻嘻!

 

 

到喇!終於都到喇!!阿仔急不及待咁跟住個指示牌向Thomasland進發!
終於搵到喇!阿仔一早已裝備好自己出發!

 

 

首先,我哋3個一齊玩咗Thomas’s Party Parade,因為爸爸話呢個好玩,其實內裡就好似香港迪迪尼維尼熊果個彈彈車!裡面都幾靚,值得陪玩!(內裡唔方便影相)

 

 

然後,阿仔就欽點咗嫲嫲陪佢玩Go!Go!Bustrode Barge!看似兒童版海盗船,但原來成架船識轉!連嫲嫲都話唔驚同埋好好玩喎!你睇佢哋幾開心就知喇!

 

 

後來,我哋就見到Bird’s Eye View with Cranky,今次就輪到爸爸陪玩,而呢個就無乜特別,只係大家坐係Cranky入面,Cranky向前轉咗幾個圈同埋向返後轉咗幾個圈跟住就落黎,感覺上有點呃錢,但細路仔就梗係話好玩!

 

 

玩完呢個就爸爸指阿仔去玩咗Happy Harold先,呢個就似香港迪迪尼果個小飛象,可以自己控制上落,呢個玩意係阿仔Favorite ,所以阿仔當然好開心!

 

 

續下頁

跟住,爸爸就指咗阿仔同嫲嫲一齊坐好似旋轉木馬咁轉既Thomas火車,上車時姐姐比咗個搖鈴阿仔!其他車卡既小朋友就跟住姐姐聽住音樂坐係火車上面搖,而阿仔就係咁放返個搖鈴係火車煙囪,因為佢覺得自己大個仔,所以唔玩呢啲嘢!似乎呢個唔係好滿足到阿仔既要求!

 

 

後來爸爸提議阿仔去玩船仔,佢又欽點咗嫲嫲陪玩!呢個玩意叫做UkiUki Cruise水上飛船,阿仔好開心咁坐前面,點知去到衝落水果個位阿仔就九秒九擰轉望住嫲嫲,驚啲水飛向自己度!好攪笑呢!

 

 

跟住我同阿仔就去玩Rock’n Roll Duncan小飛車(即係兒童版過山車),我起初估阿仔可能會驚,點知佢勁鐘意!仲要坐完即刻又拉爸爸再玩一次!外表斯斯文文既佢,原來係鍾意埋啲刺激嘢!

 

 

我哋黎到都無停過玩,玩到成兩三點原來都未食午飯!於時急不及待衝入去K’s Thomas Café開餐!內裡設計有不同卡位是以火車名為名,Thomas咁受歡迎而又得一卡,當然坐唔到,但幸好都坐到James車卡! 每款餐既食物全部都有Thomas既縱影,有啲仲有埋個可以帶走既Thomas儲物膠盒跟埋,大約1000YEN,為返港紙都係六十幾蚊,係主題樂園叫一個餐都係呢個價錢,而且小朋友又食得開心!真係幾抵喎!

 

 

醫好個肚之後,阿仔同我就去咗外面果架大型Thomas度影相留念,因為車前會有當日日子既牌啊!

 

 

影完之後,由於時間無多,所以爸爸就安排帶阿仔玩埋餘下未玩既玩意!今次,輪到玩Thomas’s & Percy’s Waku Waku Ride,原來呢個遊戲係有唔同既火車接送你遊覽一個大圈,今次服務既火車係JAMES!坐完車,佢哋唔係係上車位落車,而係車站落,而果個咁特別既車站一推開門離開就會入咗去Station Shop!真係識做生意!內裡都有好多嘢好吸引,而且好多都平過香港,好彩我哋夠定力!一樣嘢都無買喎!呵呵!

 

 

續下頁

玩完火車,我哋4個就一齊去咗Thomasland 3D Theatre睇3D電影,前頭有少少似舞台劇,有個姐姐出黎用日文講嘢,當然我哋唔明,但都估到內容,大約係講Thomas佢個火車頭既BB聲唔係太正常,要維修,跟住就播放電影,內容唔講太多,就留返比你哋自己去睇下喇!嘻嘻!片長大約15分鐘,都值得一看呢!

 

等入場時呢個小朋友見到地下既火車貼紙就係度跳跳跳!

 

 

最後,我哋返咗去比阿仔入200YEN玩唯一一個門券唔包既玩意Take the Drive’s Seat,佢分別自己揸咗Thomas 同Percy各兩次,的確係好有滿足感,因為係自己揸火車!!

 

 

我哋最後玩到4點50分左右就慢慢步行離開Thomasland,而離開既時候,見到有個迷宮,玩埋先走!:)

 

 

離開既時候,見到富士急果邊仲有好多人排隊玩機動遊戲!我哋好細膽,所以一樣都無玩過!但如果你哋係大膽既話,似乎都幾啱玩呢!真係玩到連太陽都落山呀!

 

 

後來我哋就原返原來既方法回程,仲坐到車頭位,阿仔可以望住司機揸火車,玩到咁攰,仲好精靈咁睇住!後來返到酒店,阿仔好懷念呢個地方,間唔中都仲會攞返張Thomasland導遊手冊出黎睇,佢話好鍾意!所以真係好感激爸爸最後都有PLAN到呢個行程!見到阿仔咁開心,搭咁耐車都係值得!

 

更多精選內容

There are no comments

Add yours