放電好去處

專欄

廣告

剛過去的星期剛巧休息,諗起某次阿仔同表弟玩咗個好高既吹氣滑梯,玩到唔肯走,近日得知愉景新城x SweetWalk「吹氣彈彈迷城玩轉Halloween」呢個活動係愉景新城舉行!於是就比佢哋玩返夠本!

係「吹氣彈彈迷城」裡面,主要有五個吹氣遊樂設施,有大型有小型,之前去過有啲好大型既,表弟(3歲)同阿仔(5歲)都未達安全指引既標準高度,但今次呢個,只要高度達90CM就可以玩,所以佢哋兩個可以玩晒全部好開心呢!

官方指示既玩法係要順住以下既次序去玩

(主角棉花糖Fuzzy率先帶領大家挑戰新設的「Fuzzy 蹦蹦跳」(Fuzzy Bouncer)然後逐一挑戰四大人氣障礙遊戲。緊接著,小朋友要挑戰膽量,征服「勝者為王」(King of the Hill),接著還有「迷你城堡」(Mini Castle Bouncer)、「挑戰極限」(Extreme Obstacle Challenge)及「為食巨人」(Greedy Giant Bouncer),從中克服不同障礙,鼓勵小朋友完成所有挑戰,促進家長與小朋友的互相信任和關愛。最後,力大無比的朱古力Choco更化身成「Choco 迷城」(Choco Challenge)考驗小朋友意志,鍛練自己的邏輯思維,逃出朱古力迷宮。 )

但呢兩個小朋友當然就無跟,想玩乜就玩乜,無計!老細話事!由於每個遊戲各玩一次,係每一個遊戲得到工作人員蓋印,儲齊就可以換禮物,呢個方法幾好,起碼佢地好用心會每一個都要玩一次,唔會話邊個好玩就要去同一個玩好多次!幫阿媽慳返唔少!最後每個遊戲要玩各一次就成為每人$230(23個TOKEN)咁就可以玩晒全部。真係未出發先興奮!

呢兩個小朋友完全無理設計人既感受,一玩玩咗最尾果個(「Choco 迷城」(Choco Challenge))先!點解?因為近門口方便衝入去掛?

兩個小朋友都好乖,遵守規則,清潔雙手先至入去玩!讚!

噢!轉個頭就唔見咗佢兩個!

由於太高喇!所以呢我派咗個專員(爸爸上去望落黎睇下佢哋係邊)原來佢哋兩個一入去就行咗去掘頭路!哈哈!!即刻返轉頭再搵路!好攪笑!

搵到路之後好快就搵到出路SIR咗落黎!:D 就係咁,佢哋不停入去不停SIR,但原來8分鐘都可以玩好多次!

玩完之後,佢哋就九秒九走咗黎呢個叫做「挑戰極限」(Extreme Obstacle Challenge)既吹氣遊戲,呢個望落去我本來都覺得我個平時比較靜既乖乖仔會唔係咁順利過度關,點知⋯⋯

好有驚喜,佢係咁多小朋友裡玩得都算幾好,每個較有難度既爬上去既位佢都做到,最後仲係好高既滑涕SIR落黎!原來呢個小朋友係鐘意追尋刺激!佢又係九秒九走上去,好快SIR落黎,表弟都唔差,8分鐘又係玩咗好多次!阿媽內心都係果句:「嘩!抵晒!」XDXD

後來佢哋真係可能開始攰,所以就搵返個無咁激既「迷你城堡」(Mini Castle Bouncer)玩,我個人就覺得細咗啲,好BB,但佢哋一見到波就覺得好好玩!無問題喇!最重要小朋友開心!

玩完呢個,佢哋就去玩一個考平衡同膽量既吹氣遊戲「勝者為王」(King of the Hill)

呢個望落去好似無乜特別,但有工作人員幫手抱佢哋上去個冬菇頂再落返黎,跟住係個菇既週圍可以彈彈下咁行,佢哋已經好滿足,真係好多謝工人作員幫手不停咁抱佢哋上去!辛苦晒!

差唔多到尾站,佢哋就黎完成任務!尾二站佢哋就揀咗「Fuzzy 蹦蹦跳」(Fuzzy Bouncer),表弟開始有啲疲態出現!但阿仔仍然生猛!越跳越開心!

行下玩下,差唔多一小時,真係黎到最後一個遊戲叫「為食巨人」(Greedy Giant Bouncer),佢哋兩個知道係最後一個,係裡面跳過不停!

經過差唔多一小時既活動,佢哋終於完成任務!仲儲晒蓋印取到終極禮品,現場家長填問卷仲有支好有用既消毒洗手液送添!

現場除咗吹氣遊戲之外,仲有DIY創意Halloween工作坊,面部彩繪親子攤位活動及扭扭汽球攤位等,但最令阿仔佢哋難忘就係魔術攤位,現場既魔術師係小朋友面前做小魔術,阿仔同表弟仲可以一齊參予,佢地將啲牌同波變來變去,無諗過自己都做得到,所以無限驚喜!我哋都睇到拍爛手掌!

對我黎講,唔係經常可以係週末可以同阿仔週圍去玩,當佢話比我知係跳同埋彈既過程佢覺得好開心!都已經好滿足!黎梗萬勝節都算係一個帶小朋友放電既好去處呢!