孕婦的情緒管理10方法

孕婦的情緒管理10方法

人人都話大肚婆情緒大起大落,的確懷孕會因為荷爾蒙轉變、懷孕帶來既不適或擔心寶寶健康種種原因而影響情緒,不論邊種媽媽都應該學習點樣保持心境愉快和放鬆心情,寶寶先可以健康成長做個快樂B!

擔心有產前抑鬱

自問一向EQ唔錯,不過自懷孕後EQ跌到零,好少事就會嬲同失落,亦變得好眼淺,老公都怕我,而且工作狂嘅我要續漸減量,冇工作時候又容易亂諗嘢,開始好驚自己會有產前抑鬱,所以唔可以再俾自己咁容易唔開心,唔係第時BB出世變燥B或憂鬱B就弊喇!咁點先可以令自己經常都開心呢?我自己就用以下方法做好孕婦的情緒管理喇!

1. 做運動

運動除咗可以令人減壓同健康,而且研究顯示運動係可以令腦部釋出快樂賀爾蒙。

2. 煮飯仔

研究一啲新菜式,煮啲平時好少煮嘅餸俾愛人同屋企人食,或者整個燭光晚餐sweet下。

3. 睇書

如果本身冇睇書習慣,但係呢段時間正正有好多適合準媽媽睇嘅書,既可以吸收知識,亦可以令腦袋專注在書本上。

4. 約朋友去街

有部分孕婦覺得大肚後唔可以出咁多街,又或者身邊朋友未有小朋友會覺得話題唔啱,所以唔約朋友,但係身體許可出多啲街對孕婦係有益(當然選擇一啲較好地點),同朋友行街當運動,傾偈亦唔一定傾BB嘢,俾朋友關心自己多啲,自然正能量都多啲啦!

5. 同老公屋企人多溝通

身邊人體諒同照顧係好重要,但好多時收收埋埋其他人唔一定會明白,特別懷孕之後情緒大,如果身邊人唔明白好容易有磨擦誤會,所以有咩唔舒服或者諗唔通一定要講,就算冇咩事要解決都好,講出嚟發洩吓總好過屈住,而且身邊人都會知道你係懷孕影響情緒而避免沖突。

6. 報興趣班

做自己鍾意嘅嘢或者學習一啲新事物陶冶性情。

7. 食鍾意食嘅野

孕期有好多食物唔可以食或食多,不過間中放縱一下對BB都唔會太大影響,當然唔食得嘅野就真係忍口,但係有啲食物食少少係可以嘅!不過真係唔放心可以問下醫生或上網睇多啲了解清楚。

8. 認識多啲準媽媽或媽媽朋友

不論你係剛懷孕或就快生,你會發現認識同你一樣或已經有小朋友嘅媽媽係會有無盡話題,而且好容易有一種同理心,互相都了解對方,亦可以互相鼓勵同俾意見對方。

9. 買BB嘢

鍾意shopping係女人天性,不過通常有BB後就會變咗成日睇同買BB嘢,但一樣都係咁開心!

10. 為BB整成長記錄冊

可能你會諗BB都未出世點整記錄冊,其實自知道BB存在開始己經可以記錄。每一次做檢查超升波既記錄相片,由一粒豆慢慢成形到完整;每一樣媽咪感受既第一次,第一次聽心跳,第一次BB踢自己;為BB出世前做嘅準備,買咗咩,做咗咩轉變;以上所有同諗到同BB有關嘅事都可以記錄,將來睇返一定都好有感受,又可以到小朋友大個做禮物!

當你可以做到以上事,基本上冇咩多餘時間唔開心同亂諗,而且你會發現自己獲益良多,慢慢亦唔覺得懷孕係苦差而係享受,寶寶來臨係一件幸福事,同媽媽兩為一體亦只有10個月時間,BB都會感受到媽咪心情,所以一定要開心^^

下一頁︰虎羽有云︰媽媽日常之十個反白眼時刻

虎羽有云︰媽媽日常之十個反白眼時刻

下一頁︰湊仔必經之路 9大辛酸事

更多精選內容

There are no comments

Add yours