【杞子肉碎洋葱炒蛋】

一歲打後,小寶寶都漸漸變成小朋友,有更加多好食材可以嘗試進食。

營養食材就好似雞蛋咁,一歲前都可能只會比蛋黃佢地食(因為蛋白容易令寶寶產生敏感),依家到囡囡都快要歲半啦,雞蛋已成為常用食材之一。

雞蛋含豐富的優質蛋白、氨基酸、其他營養素,如鉀、鈉、鎂、磷和鐵。

雞蛋營養咁豐富,大家當然都會煮比小朋友食,但聽到好多朋友講,每餐唔係烚蛋就只係會齋炒蛋,大人煮都煮到好悶,何況小朋友呢?

所以今次我教大家整個味道、顏色同營養都一齊「升呢」嘅炒蛋 – 【杞子肉碎洋葱炒蛋】,包保煮嘅興奮、食嘅開心!^_^


【杞子肉碎洋葱炒蛋】適合1歲以上寶寶食用

材料:

杞子・・・・1湯匙(用水浸軟,瀝水備用)

洋葱・・・・1/4個(去皮,切幼粒)

豬肉碎・・・30克

雞蛋・・・・1隻(用叉拂勻成蛋液)

熟軟飯・・・1碗

做法:

1)以中火熱鑊下少許油,下洋葱粒略炒,加入豬肉碎和杞子炒熟,將材料盛起備用。

2)同一鑊內加入少許油,下蛋液,然後加入已炒熟的洋葱、豬肉碎和杞子,以中火慢炒至蛋熟透,盛起,伴以熟軟飯食用。

更多精選內容

There are no comments

Add yours