【日本魚乾生菜洋葱蛋黃粥】

專欄

廣告

相信大家平時煮粥仔或軟飯仔,多數都只會用清水煮。但有時如果想煮啲有味粥,等小朋友覺得口味豐富啲,好多時都可能要等到咁岩屋企煲開湯,先至拎啲有味湯水去煮啲粥仔。而有人問我會否試用市面上買到的高湯來代替,講真,我真係唔建議,因為加工後的上湯,當中的鹽份太高,實在唔適合用來煮小朋友的菜式。

講到咁,唔通每次都要煲個湯先可以煮到有味粥?咁又未必!其實有個簡易上湯做法咖,就係今次食譜用到的“日本魚乾”。喺大型日資或西式超市都唔難搵到佢,一包儲存方便又耐放,唔駛預先浸水,因為好短嘅時間內就可以將佢煮至軟身。初頭我只係想用魚乾加昆布做粥嘅湯底,但我囡囡就好鐘意食埋條魚仔!肯食埋就梗係好啦,因為整條魚乾連骨一齊食,吸收到的鈣質比一般只食魚肉高好多咖~~

【日本魚乾生菜洋葱蛋黃粥】適合15個月或以上小寶寶食用

材料:
日本魚乾・・・6-8條
生菜絲・・・・適量
洋葱・・・・・1/4個(去皮,切粒)
熟蛋黃・・・・1隻
熟軟飯・・・・1碗

做法:
1)煲內注入水,以大火煮滾,加入魚乾,轉慢火煮15分鐘至出味。
2)煲內加入洋葱和生菜煮至軟身,加入軟飯和蛋黃,拌勻煮熱,即成。