【杏仁奶水果麥皮】

其實阿Bu的早餐，好多時都係自家製麵包，但即使我每次整嘅味道有點不同，都開始見到佢食到好悶。。。但小朋友的早餐夠竟仲有咩其他好選擇呢？

如果要每朝早煮個麵、粉或者粥比囡囡食，真係唔容易咖，因為整得黎又差不多要趕住返工，咁就少左時間同囡囡玩，咁我又唔想。。。。

所以我就開始整“麥皮”比阿Bu食喇～ 但大家都知道，麥皮雖然健康，但味道淡，顏色又唔吸引，點先吸引到小朋友食呢？？

參考答案就係呢次同大家介紹嘅－【杏仁奶水果麥皮】！

杏仁奶比鮮奶或豆漿多了一份濃濃的堅果香，而且杏仁含豐富維生素E、D、A及鈣、鉀等礦物質，閒時用來代替牛奶比小朋友飲用OK咖～

但要緊記，杏仁奶不適宜給對堅果敏感的小朋友食用。

【杏仁奶水果麥皮】適合15個月大或以上小朋友食用（對堅果敏感者不宜食用）

材料：
即食燕麥片・・・・1湯匙
杏仁奶・・・・・・大約1 杯（要麥皮稀身可加入更多份量）
香蕉片、紅莓乾・・・適量

做法：
1）煲內注入杏仁奶，加入即食燕麥片，以中火煮熱，轉慢火拌煮至麥片軟身及變稠，即可盛起於碗內，然後放上香蕉片和紅莓乾，即成。

貼士：
1）市面上有很多款式的燕麥片，“即食燕麥”是最快及最容易煮至糊狀，所以較適合小朋友食用。
2）杏仁奶（Almond Milk）於大型超市或有機食材店有售。