【粟米芥蘭肉粒飯】

專欄

廣告

新的一年,我地一家祝大家羊年「日日有好煮意」、「密密有食神」!

話咁快,我喺呢度寫「嬰幼兒食譜」都已經差不多九個月啦。寫下寫下,阿Bu由最初剛開始食糊仔粥仔,到依家可以食大人野,依家亦已經唔需要用攪拌機將食材先攪成汁先煮。睇返啲相,時間真係過得好快,小朋友亦真係大得好快!

呢一年來,我其實好感恩,因為阿Bu對食物好有興趣,佢亦好享受食飯的時候。雖然有時我都會煮到好累,但見到佢講話”yum yum”,我就好有力量咁再去諗多啲菜式整比佢食。你話呀,媽媽幾易氹!嘻嘻~

講返正題先,今次呢個【粟米芥蘭肉粒飯】,煮出來有個芡汁的,食材軟身又濕潤,所以好岩呢排被春天潮濕的天氣攪到冇胃口的小朋友食咖。

同時,大家亦可以煮多點,自己都食埋一份,方便省時,健康又好味^_^

【粟米芥蘭肉粒飯】適合1歲以上小朋友食用

材料:
粟米粒・・・2湯匙
芥蘭・・・・3-4棵(洗淨,切粒)
豬肉碎・・・30克
水・・・・・1/2杯
蠔油・・・・少許
生粉水・・・1茶匙生粉+1湯匙水(拌勻)
白飯・・・・1碗

做法:
1)熱鑊下少許油,下豬肉碎炒熟。
2)加入芥蘭粒和粟米粒略炒。
3)注入清水,以中火煮至所有材料熟透。
4)加入蠔油調味。
5)逐少加入生粉水拌煮至湯汁略稠。
6)伴以白飯食用,即成。