紫薯

【不是藍莓】是 紫薯 粒粒

專欄

廣告

話說噚日一朝早,我蒸左一條好香的 紫薯 比阿Bu當早餐食。點知佢唔鐘意食,食左1/3就已經停晒手⋯⋯ (佢以前食的) 紫薯 其實好有營養,除了有不同的維他命素、纖維、礦物質和蛋白質外,紫色的番薯仲有花青素,對眼睛的健康有幫助,亦有效發揮抗氧化的功效。所以即使阿Bu朝早不接受紫薯,我都想改變佢的感覺,想佢從新接受呢個咁有益的食材。

 
我望住紫色呢個咁sharp的色,突然間,我諗起阿囡好鐘意食的藍莓,我覺得可以嘗試由改變紫薯的外形開始,所以就試整左呢個小食。
 
紫薯粒粒煎完出來真係好似藍莓咖,就連我問阿Bu,佢都話喺鑊入面的係Blueberry! 哈哈,但係我唔會呃佢的,我會講話係番薯黎咖,只係媽媽將佢地整左一粒粒。各位BabiMami,記住真係唔好呃小朋友,食材係咩味、咩口感都要講清楚,我地只係用不同的烹飪方法去鼓勵佢地進食,不要強迫。而且當你呃過佢地一次,佢地下次就更加唔會食,可能連藍莓都唔食添咖,所以咪濟!

 

 
阿Bu初頭食果幾粒,佢都咪晒眼咁,因為佢未接受到點解個樣係藍莓,但個口感唔係嘅?之後佢就不停玩,一粒粒咁禁扁,玩玩下我又再鼓勵佢食,我又食幾粒比佢睇,不經不覺,喺玩玩下的情況下,佢就將半碗的「不是藍莓」食咗!

 

小朋友的口味係會不時改變,喜惡亦會愈來愈分明,做家長可以的話就盡量堅持,不時搵不同的方法去創作菜式,亦要多點親身鼓勵小朋友進食,久而久之,小朋友的飲食習慣是可以慢慢改善的。但我地亦要記住,要改變小朋友的一些習慣,可能會係一場「長久戰」,期間可能會令我地好有挫敗感,但都不用太緊張,因為每個小朋友的成長和習慣都不同,先不要和其他人比較,只要自己的寶貝健康快樂,進食每次有少少進步,就已經值得獎勵及滿足了~ ^_^

 

下頁有:適合10個月以上寶寶食用的紫薯粒粒食譜

【不是藍莓】

適合10個月以上寶寶食用 **大人要確保寶寶食用時要咀嚼,不要整粒吞下,以免哽親**

材料:
紫薯蓉・・・・100克
蛋・・・・・・半隻
粟粉・・・・・2湯匙
鹽・・・・・・少許

做法:
1)將已蒸熟的紫薯蓉用叉壓至滑身,然後加入已拂勻蛋液,拌勻,再加入粟粉和鹽攪拌成粉糰。
2)粉糰搓成長幼條形,然後切成小粒,再將每粒粉糰滾圓。
3)熱鑊下少許油,下粉糰粒,轉慢火,大約煎3分鐘至粉糰熟透,煎時要不時搖拌煎鑊,避免粉糰痴作一團及煎焦。

4)煎後的小丸子外型像藍莓,外皮有點脆,裡面軟熟粉糯,趁熱食用最佳。

關鍵詞
紫薯藍莓