【自製杏仁奶】

專欄

廣告

牛奶、豆漿飲得多,大人都覺悶啦,何況小朋友要日日飲?

除左味道,營養方面都係做爸爸媽媽會關注的。杏仁熱量雖然唔算低,但不含膽固醇,而杏仁當中的不飽和脂肪酸, 對心臟健康有幫助。而且佢含豐富纖維,可幫助腸道健康,所以得閒整下清香幼滑的「杏仁奶」絕對係另一個好選擇。

坊間其寶都有好多一盒盒的杏仁奶買,但我覺得點都唔及自己喺屋企整咁真材實料同安心嘅。

另外,好多人一聽到「杏仁奶」呢幾隻字就以為陣杏仁味會好搶,其實一啲都唔係,陣杏仁味其實好清香,並唔係果隻用黎整蛋糕的杏仁精油咁假的味道。而我今次加左少少豆漿,就令到杏仁奶更香甜,當然你都可以選擇唔加。最開心就係自己整,自己可以控制所有份量~ ^_^

我老公本身唔鐘意杏仁,我叫佢試佢都擰晒頭咁,點知比我迫佢試左一啖之後就完全改觀晒!杏仁奶真係好好味,同牛奶豆漿絕對有得揮!!

【自製杏仁奶】
材料:
杏仁・・・・120克
熟水・・・・200毫升
低糖豆漿・・200毫升

工具:
魚湯袋、篩

做法:
1)將杏仁用水浸過夜,瀝水,再放入*Miele蒸爐內以100c蒸10分鐘。
2)杏仁用手去衣,然後連同熟水和豆漿放入攪拌機內攪拌成漿,然後用布篩(魚湯袋都可以咖!)篩走豆渣,重覆過篩步驟,即成。

*可改用普通蒸爐以中火蒸
*有些人會選擇浸過夜後就直接攪成漿(記住用熟水浸),但我覺得蒸過啲杏仁會更軟身,可以榨出更多汁。