愉景灣全港最長室內滑梯

愉景灣全港最長室內滑梯

(Presented by 香港愉景灣)

一到暑假我哋做媽媽嘅真係更加忙,因為要好好安排仔女嘅暑假活動。作為細心嘅媽媽,我已經一早打聽好香港親子好去處,好似8月愉景灣有條11米高嘅沙灘充氣滑梯免費任玩,可惜我對仔女唔夠130cm高玩唔到,但我又知道愉景灣仲有個室內遊樂場,嗰度有條30米長滑梯可以俾我同小朋友一齊瀡,價錢仲好公道;室外就有觀光馬車坐同沙灘兒童遊樂場,啱晒一家大細玩足1日!

24吋特大Pizza
要有力玩就梗係要填飽個肚先啦。愉景北商場有幾間有特色餐廳,土耳其、印度、巴西充滿異國風情嘅菜式,都好啱我呢個貪新鮮媽咪嘅口味。當我仲諗緊食乜好,老公同兩個細路對眼已經發晒光咁望住Paisano’s個大Pizza櫃,而我就望住個肚腩,唉,好啦,一陣玩多啲當減肥啦。

空氣好嘅環境,坐室外食飯好有歐洲Feel。
老公本來想點個24吋嘅,但點可能食得晒呢!最後點咗個16吋,4個人食啱啱好。

30米長室內滑梯
位於愉景灣北商場嘅歷奇王國Discoveryland,面積達14,000呎,場內有4條30米長、約3層樓高嘅滑梯,包括3條七彩波浪滑梯及1條密封黑暗滑梯,後者猶如進入黑洞,比冇蓋嘅七彩波浪滑梯更加刺激。我個女第一次玩時更嚇到喊,但又堅持要瀡多幾次,後來個傻女都冇再驚,笑死我同老公,哈哈!

唔理大人定小朋友,想瀡得快、唔擦傷,記得最好著長褲玩!

波波噴泉
另外,我對仔女喺波波噴泉同波波射擊場,更加玩到失晒控,我哋不停執啲七彩波波放落個噴泉度,小朋友一撳掣啲波波就好似噴泉咁噴出嚟。小朋友見到滿天七彩飛波就笑到停唔到,我同老公見到小朋友咁開心,即使執波執到上氣唔接下氣都係好值得!

波波噴泉會噴七彩波波出嚟,小朋友見到勁興奮!

室內高空繩網陣
雖然我對仔女唔夠高玩全場最刺激嘅高空繩網陣,但我同老公係正宗大細路,我哋入得場當然唔會錯過喺約5米高嘅鋼塔裡面飛簷走壁嘅過癮機會!夠130cm高嘅小朋友亦要留意,開始咗高空繩網陣,必須過關斬將先可以到終點,無得中途退出,最啱訓練小朋友膽量。不過家長可以放心,現場有齊全副安全裝備,同全程有專業導師睇實,好玩刺激又安全!場內亦有攀石場、迷你高爾夫、彈床、迷宮陣等設備,大人小朋友都可以玩足大半日,絕無悶場!

可以喺約5米高嘅鋼塔體驗飛簷走壁,夠晒刺激!
全程有專業導師帶路,又戴晒頭盔同安全繩,安全度十足!
關關難過,關關過,好多小朋友都好大膽,一啲都唔驚!

海濱觀光馬車
玩完咁刺激嘅室內遊樂場,都已經4點幾,啲小朋友仲好好精力,但係我哋兩個大嘅已經投晒降,於是就決定坐觀光開篷馬車,漫步海傍及充滿歐洲風情嘅鐘樓廣場,一邊欣賞風景,一邊吹住海風休息一下。兩個城市小朋友都未坐過馬車,勁興奮,問咗好多問題,都好順便俾佢哋接觸多啲動物知識。一落馬車小朋友話要繼續瀡滑梯……

對仔女第一次見咁大隻嘅馬,仲可以坐住佢欣賞海景,大人同小朋友都好滿足。

沙灘兒童遊樂場
雖然我同老公都鍾意玩啫,但我哋都已經冇晒電,唯有帶小朋友去大白灣個沙灘遊樂場繼續放電,我哋兩公婆就拖住手坐喺度談心,已經傍晚,沙灘啲海風好舒服,個景又超靚,好耐冇試過咁浪漫,如果可以對住呢個景食燭光晚餐就好喇!(好在老公都好識做!嘻嘻!)小朋友就繼續瀡,又可以堆沙。諗落其實呢度游水都幾好,暑假仲有免費沙灘遮同沙灘椅,下次要記得帶埋泳衣嚟。完成咗放電愉景灣一日遊,小朋友返到屋企一沖完涼就大覺瞓,故仔都唔使我哋講,爽!

玩唔夠喉嘅小朋友可以再戰大白灣沙灘個兒童遊樂場。

歷奇王國Discoveryland
地址:愉景灣愉景北商場地下G31(顯示地圖
電話:2441 0098
網址:discoverylandhk.com / www.visitdiscoverybay.com

觀光馬車暢遊
地址:香港愉景灣酒店地下活動中心(顯示地圖
電話:2295 8140
網址:www.aubergediscoverybay.com/tc

更多精選內容

There are no comments

Add yours