忙過返工之大戰BB展

以前做PR湊客忙,放工都可以呻下;而家湊仔仲忙,全天候笑面迎人兼冇得say NO…完!

不過,醒目嘅婷婷媽當然識從中找樂趣,呢份工先至長遠。喺上個星期,我就放低阿仔,同老公去咗喺會展舉行嘅第23屆BB展,一年只得2次,絕對係媽媽們尋寶兼解決shopping癮嘅好機會! 目標其實好簡單,就係奶粉、手推車、嬰兒大床、地墊、孭帶、尿片、玩具……等,都係嗰句,盡……買!

1. 買奶粉送玩具

入到會場第一時間當然係掃奶粉,皆因即場送玩具,仲要係名牌子Fisher Price同Vtech玩具,其中一款係火車頭,儘管我姪女只有14個月大,仲未識玩,但免費送唔係唔要呀…!?

現場見到唔少媽媽們都去排,個個booth都至少要排45分鐘以上,真係少啲腳骨力都唔掂,醒目嘅我,當然係叫老公排,而我再轉戰其他booth。

2. 揀play mat重質唔重樣

其中一樣喺BB展必買嘅一定係play mat,但買之前就做足功課。Baby Kingdom首推Alzipmat及Dwingular,Alzipmat顏色就靚,不過比較「腍」,bb識行之後就唔太啱用;而Dwingular就夠貪佢有ABC圖案,學到英文之餘,學行之後都仲可以繼續用,所以計過度過之後都係決定買Dwingular。

今次BB展Dwingular都有參展,其中有2款都係7折,最後我揀咗最細size play mat,600幾蚊,超抵。

3. 活用Coupon Book

其實BB展咁多人去係因為有好多免費禮物送,只要喺臨入場前俾$15就可以買本coupon book,憑券去番參展商個booth就可以換禮物,禮物類型多到數唔晒,包括口水肩、短襪、尿片、餐具、紗巾…等,相當吸引,不過每張coupon都要填資料,勁嘥時間。

而醒目嘅婷婷媽當然做足準備,入場前已事先整好個人資料嘅label,喺coupon上面一貼就搞掂,慳番唔少時間。今次收穫最最最滿意就係由牛欄牌奶粉送出嘅餐具同埋交行嘅豬仔錢罌。

4. 有機食品大搜羅

而家成日都講有機食物,唔止大人,連小朋友都要有機,好似今年會場入面多咗好多賣有機食物嘅booth,真係眼都花埋,唔知點揀,其中1間係嚟自英國嘅Little Freddie,專賣organic BB food。

雖然係organic,但係始終阿仔鍾唔鍾意食最緊要,唔敢買太多,少少哋買咗2包試試,係咪好精明先?

Shopping完又返回現實,因為要unpack再收納好,仲要湊仔……完~

更多精選內容

There are no comments

Add yours