3歲定80都要玩得High

3歲定80都要玩得High

呢個係一個科技主宰嘅世界,乜都要“High Tech”,智能手錶智能眼鏡一街都係嘅時候,科技梗係唔會放過小朋友啦,連佢哋嘅玩具亦嚟個大進化,玩都要玩得High,一於提早加入高科技世界,咁先叫贏在起跑線囉!

就好似呢支Mozbii筆,表面上係1支普通平板觸控筆,但實際上其實係1支識「吸色大法」嘅神奇筆。玩法好簡單,就係利用筆上圓圓嘅頂部,以按壓嘅方式喺物體上掃描顏色,然後就可以用支筆喺平板上塗上色彩。我心諗「唓,有咩咁特別啫,小畫家咩顏色都有啦。」但諗真啲,對於小朋友嚟講,佢哋畫畫唔再受制於顏色筆上嘅顏色,反而可以多咗一層探索嘅過程,呢啲咪係啟發潛能囉!

(網上圖片 來源: Mozbii)
(網上圖片 來源: Mozbii)

覺得「神奇筆」仍然太低層次,想再玩High Tech啲嘅,有! 以下呢個MOYUPI系列玩具實啱大家心水。MOYUPI主要就係利用嶄新既3D打印技術,將小朋友喺紙上畫出嚟嘅公仔,透過一系列掃描同打印,變成1隻可以揸上手玩嘅玩具,簡直有夢想成真嘅感覺。嘩,玩到咁高科技,唔好話小朋友覺得吸引啦,連我聽完都心郁郁想整番隻啊!

(網上圖片 來源: Kickstarter)

玩嚟玩去都係畫畫,想郁動下玩下煮飯仔嘅,呢套「紙皮煮飯仔」套裝就必買啦。雖然望落又真係好似唔太美觀,但其實每件煮飯仔工具都有個空位可以放入1部iPhone。當玩嘅時候放入iPhone再開埋個煮飯仔APP,個套裝就搖身一變成為真實版「Cooking媽媽」,有聲又有畫,玩起上嚟投入好多㗎。不過我想問如果我想整8餸1湯嘅話,係咪要有9部iPhone先玩到㗎?

(網上圖片 來源: Makuake)

更多精選內容

There are no comments

Add yours