速學DIY玻璃戒指吊咀

專欄

廣告

貪靚係女人天性,Keicy 同 Kassy 都唔例外。

佢哋唔止喺屋企成日戴玩具頸鍊同戒指扮靚,仲叫我買多啲畀佢哋戴㖭!

既然聖誕節就到,一於帶佢哋去新城市廣場 DIY 玻璃飾物,完成品當係聖誕禮物,順便教育兩位小公主:飾物唔一定要人送,自己整都得!^^

`

工作室為每人提供一塊正方形嘅玻璃,首先我哋喺粉藍、綠,同白色之中。揀自己鍾意嘅顏色。

`

跟住放喺白紙上高,再唧膠水。

`

然後攞個銀色長鉗,將一粒粒色彩繽紛、唔同形狀嘅粒粒放上去。

`

工作室嘅哥哥介紹,呢啲粒粒係由長條切出嚟㗎!

粒粒都咁靚,揀邊粒好呢?

`

黐好咗一邊之後,就攞另一塊玻璃,好似三文治咁樣夾住佢。

`

然後放入一個白色容器,再鎖實,就可以放入微波爐叮熱!

冇錯,係好多人屋企都有嘅微波爐!

`

話咁快就叮完。

`

我哋嘅作品遇熱後會融 ,啱啱攞出嚟嘅時候係橙紅色,慢慢攤凍咗之後,就會變返透明。

`

跟住就可以黐喺頸鍊個托,或者戒指上面,完成自己嘅小飾物喇!^^

`

原本以為用工具同加熱時會有危險,不過全程都非常安全。

`

而 Keicy 同 Kassy 聽工作室哥哥介紹嗰陣好留心聽書,亦都整得好開心,一整完就急不及待要戴!

佢哋仲話想整多幾個送畀婆婆、嫲嫲、老師以及同學㖭!

今次時間唔夠,下次要去參加玻璃工作室嘅課程,整多幾款喇!:)

`

整完飾物,我哋三個出去室外睇紫藍色玻璃花海,同過千個人手製作嘅玻璃佈置,全部都好靚,好特別!

原來呢條 amazing 嘅「璃光大道」,係世界各地嘅玻璃藝術巨匠破天荒跨地域交流,Keicy 同 Kassy 係咁大叫 beautiful!

我就趁呢個機會教佢哋多一個生字:Romantic

`

希望嚟緊嘅聖誕節,可以同老公嚟跟大師學整玻璃飾物,製成品就係我哋 DIY 嘅聖誕禮物!

So romantic!^^

 

FB: KeicyKK