15分自行分配=四線姐仔釣金龜?

15分自行分配=四線姐仔釣金龜?

2015至16學年官津小學小一自行分配學位,家長喺下星期(9月22至26日)就可以交表喇!各位家長可以不限地區、校網,向一間心儀學校遞交申請。喺呢個階段,大部份只得15分揸手嘅家長就應該最頭痕!想博傳統名校同網內熱選又唔夠分;自己細個讀嗰間唔差,但係如果要跨網報名,又怕冇咗「111」嘅叩門優勢,到頭來又要大抽獎等派彩,囉囉攣足大半年!

咁得15分喺手,自行分配係咪真係冇得玩?都唔係咁絕望嘅!我哋問過升學專家趙sir攞意見,趙sir就醒咗3招「自行分配填表終極絕招」俾大家,喺呢個最後階段,幫大家做個明智嘅抉擇!

第一招:「傳統名校唔使諗」

如果得15分揸手,喺呢個階段,家長真係可以對啲傳統名校死心喇!因為呢類學校幾乎都有宗教背景,冇25分都唔使諗,差成10分,邊有得同人鬥?所以家長唔好心存僥倖走去博,傳統名校唔得啫,你仲有其他選擇!

第二招:「向心儀官校埋手」

官校好處係冇宗教背景,即係人人都冇嗰5分宗教分,入場分數以20分起跳,5分差距仲有得博!如果喺自己校網嘅官小口碑唔錯,你又鍾意,就即管去馬,起碼唔會蝕咗叩門嘅「111」優勢。如果鍾意嘅係其他校網嘅都唔會蝕底,因為官校多數有聯繫中學,升中有保障,有細佬妹嘅仲可以益埋佢哋tim!

第三招:「發掘無雙小學」

何謂「無雙小學」?即係一啲創校未夠17年(即1997年後), 又冇宗教背景嘅小學。呢類學校有咩好?因為呢類學校幾乎全部申請者都係得15分,即係機會均等啦,話唔定有機會抽中入讀地方名小學tim!就算部份有宗教背景嘅新校,都未必所有申請人都攞到5分宗教分,而且前題係冇舊生,所以20分同15分博,都唔係完全冇勝算!

 

唔明?呢度有個易明啲嘅版本!

舉個例,如果電視台四線姐仔想入豪門,搵咩Target最有把握呢?

grey
名門望族

名門大戶講求門當戶對,四線姐仔名氣唔夠,家底又唔厚,邊夠啲千金小姐、國寶級運動員,仲有影后級明星爭丫!所以都係無謂浪費青春,死咗條心罷啦!

官二代

做官嘅出身唔一定高尚,所以門戶之見唔會咁深,少咗家族屏障,值博率即刻高咗!而且官二代學歷水平一定唔會差,未必似上一代有權有勢,不過一樣有「錢途」架!做唔到千億新抱都一定唔會餓親,養兒育女一定無問題!

暴發戶

極速發跡嘅暴發戶,吓吓講面子,所以出手都闊綽過人,有啲人識吓嘅奀星姐仔,都好易埋身!只要你唔計較佢出身,或者係地方土豪;甚至有眼光喺佢未發跡之前出手,一樣好大機會可以嫁個有錢人!

總括嚟講,15分姐仔質素,條件唔夠優厚又想入豪門,最緊要唔好心頭太高,捨難取易,向target埋手,咁至可以嫁得更有把握!

參考資料:

list

**部分創校不足17年嘅小學,可能係由舊小學分拆,之改後更改校名,所以家長宜先致電學校核實清楚。

 

kissExperts

提提你,雖然自行分配學位收表26號先截止,不過慎防資料文件有甩漏,所以最好喺截止前兩日交表,萬一有乜錯漏,到有時間補救!

 

更多精選內容