大女備戰小一 胡諾言訓導上身

大女備戰小一 胡諾言訓導上身

胡仔教仔最頭痛之一是食飯問題,「我諗好多家長都遇過,啲小朋友食飯個幾兩個鐘,都係食咗半碗,或者食到一地飯餸,我成日叫佢食快啲,啲餸咗落地要自己執番,人哋幫你執就要講唔該。」
胡仔教仔最頭痛之一是食飯問題,「我諗好多家長都遇過,啲小朋友食飯個幾兩個鐘,都係食咗半碗,或者食到一地飯餸,我成日叫佢食快啲,啲餸咗落地要自己執番,人哋幫你執就要講唔該。」

無綫正播映的實況劇《我們的天空》,由胡諾言(胡仔)和姚子羚一家每集帶出不同階層故事,圍繞教育、住屋、中港矛盾等一連串社會問題,劇中胡仔不做怪獸家 長, 以放鬆態度教仔,盡顯慈父一面。但返回現實,胡仔對兩個女Jay Jay(胡芷苓)和Jacey(胡芷悠)像個訓導主任,嫌阿女食飯慢、做錯功課、阿妹打家姐,經常氣上心頭,最近為了大女考小一,特別重視其禮貌及談吐, 連Jay Jay都怕了爸爸:「你鬧我就唔開心,我會喊。」胡仔解釋一切都是愛之心,責之切,希望兩個女聽教聽話。胡仔今次首次帶同細女Jacey受訪,兩姊妹一齊 跳跳紮,無時停。

劏房拍劇印象深

《我們的天空》由前廣播處長黃華麒監製,製作有別一般劇集,平時一套劇20集,僅花兩個半月完成,但此劇12集的拍攝時間長達五個月,而且差不多全實景拍攝,以反映香港最真實一面。首次擔正的胡仔飾演雜誌編輯,有如實地採訪不同階層人物,印象最深刻是劏房一集,「我有自己事業同家庭,有自己小朋友,生活上afford到,接觸過劏房環境之後,發覺原來香港繁榮背後,真係有人咁慘,為兩餐都咁多問題,有小朋友嘅家庭,一齊迫喺一百呎都冇嘅劏房,要照顧起居飲食,又要照顧小朋友,我好同情佢哋,覺得自己好好彩,要珍惜所擁有嘅一切。」

對胡仔最切身的教育問題,他揚言不會如「望子成龍」一集做虎爸虎媽,迫仔女做精英,但香港急促的生活環境,不禁令他緊張起來,「我以前讀書都唔叻,都有頑皮一面,讀書叻唔代表將來成功,有啲成功人士以前讀書都係一般。但香港環境令人有無形壓力,例如見到朋友會講揀學校,點樣計分,又話宗教信仰點幫助小朋友攞分,見到一啲課程單張,介紹點樣訓練小朋友面試對答、練腦筋,琴棋書畫要樣樣識。」最大的無形壓力,可能來自朋輩,「平時自己都唔緊張,但一聽到啲人話阿邊個入咗間名校,阿邊個又入咗另一間名校,佢就好啦入到呢間……呢啲說話都係無形壓力,但生活喺香港冇辦法,社會太急促,樣樣嘢講求競爭力,所以慢慢自己都緊張咗。」Jay Jay下年升小學,現在開始揀學校報名,胡仔都加緊留意,分擔老婆的工作,「學業方面我一向交晒俾老婆,做功課、揀學校、培養興趣等等,都係老婆負責,我教小朋友品德為主,似一個訓導主任,教佢哋禮儀同待人接物。」

胡仔覺得做女仔壓力較小,男仔需要有學識,有能力養起頭家,女仔對學識中規中矩,人品好就夠,所以對兩個女沒有抱好大期望。
胡仔覺得做女仔壓力較小,男仔需要有學識,有能力養起頭家,女仔對學識中規中矩,人品好就夠,所以對兩個女沒有抱好大期望。

報讀傳統名女校

Jay Jay現就讀樂基幼兒學校(九龍塘)K3,沒有小學直升,要做定心理準備考明年小一,胡仔首選傳統學校,「我覺得男仔比女仔壓力大,男仔要喺成績上、能力上表現好啲;女仔可以柔弱少少,我唔需要個女樣樣no.1,中規中矩就得。可能中學階段會送佢出國讀書,都未知嘅,所以小學更加想佢讀番啲正規嘅嘢。」
胡仔兩夫婦正考慮大包圍報名,名校如女拔、協恩、德望,九龍塘和將軍澳區都會報多幾間,「都係老婆負責揀,當俾個機會佢試吓啦,得唔得唔緊要,都係多個面試機會,揀邊幾間就未確定。」不過,要入協恩和德望小一好高難度,兩校都會先收直屬幼稚園生,胡仔大嘆當時走寶,「遲咗!輸經驗!我記得當時老婆問我,要唔要報定呢兩間幼稚園?我話唔使啦,到時先算啦!結果就咁囉,又要再報過,遲啲睇吓細B啦。」

應付面試重禮貌

報讀直私小一,面試是成敗關鍵,很多學校着重學科及技能之外,品德也是取錄因素,「訓導主任」胡仔最緊張就是囡囡的品德,但他沒安排上面試班,決定親自教導,即使非為面試,亦終身受用。「呢一刻我最緊張佢有冇禮貌,或者面試時,能唔能夠清楚介紹自己,同老師交談時嘅眼神接觸,我着重呢啲嘢,但面試班太機械式,我寧願用自己第一身教佢,有時透過一啲經歷去訓練佢膽量同自信心,好似今日嚟做訪問影相,佢有份參與,我哋亦同時拍緊《爸B也Upgrade 2》,原班人馬上陣,透過呢啲經驗,可以訓練佢談吐舉止,如果佢犯錯,我就即時提點佢。上次佢同Nana(李霖恩大女)因為小事推撞,但相隔一年,佢同Nana、霏霏(林盛斌Bob大女)再聚頭,變得好friend喇。」

Jay Jay 今年升K3, 開 始多功課,胡仔為她訂 立時間表,培養她自律 習慣。
Jay Jay 今年升K3, 開 始多功課,胡仔為她訂 立時間表,培養她自律 習慣。
胡仔覺得兩個女好似樣, 湊細女時,彷彿回到幾 年前湊大女的時候。
胡仔覺得兩個女好似樣, 湊細女時,彷彿回到幾 年前湊大女的時候。

妹妹家中小霸王
胡仔可以放心,Jay Jay不怕陌生人,充滿自信,訪問當日她一見到我們一行人,即時自我介紹,「Hello,我叫胡芷苓,我今年五歲,我仲有一個阿妹,佢叫Jacey,今年兩歲㗎咋!唔該哥哥姐姐,幫我哋影多啲靚相吖!」JayJay到場前一晚,努力練熟的自我介紹,如果她面試時拿出這份自信,應該幾大機會入讀心儀學校。
Jay Jay第一次聯同妹妹Jacey做訪問,由換衫到埋位拍攝,她一直照顧妹妹,又怕妹妹沒笑容不上鏡,逗她一齊跳舞哈哈笑!Jay Jay自稱好錫妹妹,但又爆妹妹經常打她,「佢仲成日搣我同摑我!我會話俾爸爸聽,爸爸會鬧佢。」胡仔在兩女心目中是惡爸,Jay Jay食飯慢、功課做錯,一樣照鬧,Jay Jay坦言被爸爸責罵覺得不開心,「我會喊,有時會唔睬爸爸。」胡仔解釋一切都是為女着想,不想她行差踏錯,慶幸囡囡尚算聽教聽話,「Jay Jay都肯聽人講嘢,當然佢都有頑皮嘅時候,我相信每個小朋友都有,好彩我同佢講嘢,可能一次唔聽,第二次都唔聽,第三次都會聽嘅。」相比兩姊妹,胡仔形容Jay Jay服從性較高,Jacey則較野蠻,「好似個小霸王,佢一見到家姐有嘅就想要,佔有慾比較強,都正常嘅,小朋友都想爸爸媽媽錫多啲㗎啦。」面對兩隻化骨龍,胡仔大嘆好難湊,不敢再生第三個,「湊細路真係一門學問,唔係俾佢食同瞓就得,好多嘢需要親力親為參與,好似今年Jay Jay升K3開始多功課,我要幫手睇,又要灌輸做人道理,所以一定要多啲喺身邊陪佢,教導佢。」

 

●撰文:Ling
●攝影:Paul Choi( 部分相片由受訪者提供)

 

 

 

更多精選內容