2015年度學界男女神頒獎典禮

2015年度學界男女神頒獎典禮

每年一月都係頒獎典禮嘅旺季,「學界男女神」都玩咗一年有多喇,不如都趁吓熱鬧嚟做番個總結啦!喺2015年,有51位嚟自中學同大專界嘅靚仔靚女,做過「學界男女神」嘅主角,當中究竟邊幾位最受網民歡迎? 邊幾位最得編輯部評審歡心?結果即刻話你知!

 

好!首先要頒嘅,就係「2015年度編輯部專業推介男女神」嘅頭三位!呢個獎係由我哋編輯部、攝影組、美術組嘅成員,以及為一眾男女神化過妝、set過頭嘅化妝師、髮型師,一人一票投選出嚟嘅!究竟我哋嘅專業眼光,同你哋心水係咪一致呢?除此之外,仲有好多其他巧立名目嘅獎項,喺適當嘅時候,我哋會亂咁切入,亂咁頒發! 事不宜遲,立即頒發第一個獎!

 

「2015年度編輯部專業推介男神」第3位

恒管吳尊 – 黃鍵安

0079

男神嘅票數,一直都咬得好緊,難分高下。因為評審係以專業角度出發,所以「靚」並唔係唯一嘅指標,反而上唔上鏡,識唔識擺甫士,影相拍攝嘅過程爽唔爽,都係我哋比較重視嘅!喺呢方面Leo黃鍵安就好有優勢喇!投佢票嘅同事大都認為佢靚仔得嚟又有自信,身型又fit,最重要係影相好爽手,配合度夠高,呢個同佢有model經驗絕對有關!

0162

A! A! A! 仲有一個獎呀!

「Chok力驚人男神」大獎

影相對Leo嚟講,絕對係easy job, 佢唔止對鏡頭敏感度高,亦都真心鍾意喺鏡頭面前表現自己,只要鏡頭對住佢,佢自自然然,就會自動自覺咁 chok,影一輯相閒閒地影幾個鐘架! 可以長時間keep到呢份耐力,係咪點都應該要嘉許吓先!?

恭喜Leo!

「2015年度編輯部專業推介男神」第2位

港大陳偉霆 – Jason Luk

3203

Jason陸頌賢都有做開Model,所以擺甫影相對佢嚟講一樣冇難度。投佢票嘅同事,大多認為佢有星味,身材又高大,可塑性好高,當然覺得佢同陳偉霆好似樣,就係最令人印象深刻架啦! 而且佢表現都好專業,影相當日帶咗一大喼衫嚟畀我哋揀,有心有態度,影出嚟嘅效果,大家都好滿意架!

2890

「難分真與假男神」大獎

有留意「學界男女神」facebook專頁嘅,都應該有睇過Jason幫我哋拍咗兩條偽娛聞片,其中一條就係呢個假陳偉霆,拖埋自己個真女友- 城大梁詠琪阿Kat一齊扮被偷拍,呢條扮偷拍片仲逼真到,引嚟唔少網民鬧我哋侵犯私隱,連學生都唔放過! Take it easy! 戲嚟嘅啫! 正所謂「你睇到嘅未必係真,真嘅又未必比你睇到」,呢個時候不如一齊嚟回顧一下啦!

恭喜Jason!

 

「2015年度編輯部專業推介男神」第1位

撞樣男神 – 劉寶業

COVER

喺今次內部票選中得到最高票數嘅男神,就係Vincent劉寶業!睇番網站嘅點擊率,Vincent呢一期並唔係特別標青,不過好多攝影師對佢都有好高嘅評價,高大靚仔唔使講,最重要係話佢影相嘅時候,表現一啲都唔造作,而且成熟淡定,好有台型!

883628

當然Vincent個樣同好多型男撞到嘭嘭聲都係一個賣點啦! 又似伍允龍,又似羅仲謙,肯定係靚仔嘅指標啦!

恭喜Vincent! 一齊聽吓佢嘅得獎感受丫!

 

「2015年度編輯部專業推介女神」第3位

浸大新聞小花 – 黃可盈

0244

頒完男仔就到女仔喇! 女子組嘅戰況,比起男子組明朗得多,頭3位女神嘅票數,一早已經彈出!記得Flavia黃可盈輯相,係喺舊年農曆年影嘅,當時佢喺鏡頭面前,就表現得比較生硬,但係談吐就好大方得體,加上個樣的確生得標誌!

9939

「密密有job接女神」大獎

過咗一年,同事們對佢嘅印象依然好深刻,而且Flavia已經有城大Asso,升咗上浸大新聞系;亦都影過唔少相,拍過唔少片,當中仲有廣告、電影同港台劇,表現愈戰愈勇,面對鏡頭都愈嚟愈熟練,大有前途呀!

恭喜Flavia!

好! 頒到呢度,又頒吓第二個獎先! 呢個就係「2015年度人氣男女神」大獎喇!呢個獎係統計過去一年,51位學界男女神,喺《Sunday Kiss》網站,同Sunday Kiss YouTube Channel嘅點擊率,綜合最高嘅頭三位,就可以得到呢個榮譽架喇!

「2015年度人氣女神」第3位

理大千金 – 鍾欣庭

2403

中學年代係女拔嘅游泳健將,喺學界人氣爆燈嘅Teresa鍾欣庭,上到大學更識打扮,仲靚女咗,游得又睇得! 號召力依然有番咁上下! 唔怪得輕鬆入到「人氣女神」嘅第三位!
D6A2545

經過一番轉折,Teresa入咗PloyU,游水唔再係佢嘅發展重心,不過依然有為理大泳隊效力。佢而家除咗做part time model,仲入咗Poly drama soc,對戲劇表演愈來愈有興趣,未畢業已經累計咗咁多經驗,以佢嘅條件,就算將來真係要入行做明星,都已經有一班Fans做backup,一定冇問題啦!
恭喜Teresa!

「2015年度人氣男神」第3位

高顏值爆肌男 – 李展樑

2672
唔知網民係咪真係好鍾意睇 「巨肌」,今年入選「人氣男神」嘅頭3位,都有一個共通點,就係「騷肌」!今年19歲嘅Jason 李展樑,用咗年半時間,就將自己由排骨仔變咗做爆肌男,而呢身肌肉,都為佢奪得「2015年度人氣男神」嘅第3位!

2740

「粒粒皆辛苦男神」大獎

操到粒粒朱古力都咁突出,其實都好辛苦架!Jason話首先要控制好飲食,七成飲食三成操,甜品煎炸嘢都唔食得,平時仲要自己帶飯盒出街!不過辛苦得嚟都有成果嘅,Jason仲話有信心可以操得fit過彭于晏tim呀!嘩~ 咁要拭目以待喇!

恭喜Jason!

「2015年度編輯部專業推介女神」第1位 +「2015年度人氣女神」第2位

女拔混血BB – Lucy Stewart

D6A0169

混血兒多數都係身材高挑早熟,輪廓細緻分明,鬥靚一定加哂分!嚟自女拔嘅Lucy BB就有呢個先天嘅優勢喇,加上只得15歲,仲有大把潛能有待發掘呀!所以我哋內部好多同事對佢都有好深刻嘅印象,一講投票就話要投畀Lucy,喺票數上真係贏咗半條街架!

咁高質,受到網民關注就更加唔出奇啦!Lucy BB好叻叻豬呀!一次過就擸咗「2015年度編輯部專業推介女神」第1位 ,同「2015年度人氣女神」第2位 兩個大獎!
D6A0046
Lucy BB而家只係得15歲,首要當然係讀好書先啦! 但係夢想做演員嘅佢,都好珍惜可以演出嘅機會架,除咗平時參加開嘅經典劇場,Lucy BB舊年仲拍咗一個飲品廣告tim! 箍完牙,笑都笑得燦爛啲,要再拍廣告,可能機會仲多tim呀!

恭喜Lucy BB! 聽吓佢有咩得獎感受啦!

「2015年度人氣男神」第2位

欖球大隻仔 – 徐灝晴

7906

話咗3位人氣男氣都係大隻仔,咁當然唔少得Hugo徐灝晴 啦! Hugo係港青欖球猛將,一身肌肉唔係為咗靚,而係為咗要喺球場上衝鋒陷陣,嘩~ 真係諗起都覺得熱血呀! 佢唔止睇得,仲好打得架!2015年嘅「亞洲19歲以下青少年欖球錦標賽」,Hugo都有份出力,助香港贏得「亞青三連霸」嘅榮譽,真係好堅呀!

7854

其實Hugo喺編輯部嘅票選當中,得票一啲都唔低架! 同第三位嘅Leo,只有極細嘅差距! 好多同事都讚佢表現自然,唔造作,好有陽光氣息! 可能好多網民亦都因為咁,所以都咁like佢啦!

恭喜Hugo!

「2015年度編輯部專業推介女神」第2位+「2015年度人氣女神」第1位

中大真光豬 – 羅嘉敏

cover

呢隻真光豬真係好厲害呀! 樣靚唔在講,笑容燦爛,人見人愛,令佢深得網民喜愛,人氣一枝獨秀! 唔止咁呀!Carmen嘅表情多多,大情大性,亦都冧盡一班編輯部選民,人氣同選票,就將佢捧到成為「2015年度編輯部專業推介女神」第2位+「2015年度人氣女神」第1位嘅得主喇!

0720

「最具演藝潛質女神」大獎

睇過Carmen嘅訪問,都知佢咩都夠膽講,佢嘅率直亦都係佢嘅魅力所在! 好可惜當時實在冇機會畀佢表現佢嘅才藝, 其實Carmen本身玩開音樂劇,又唱得又跳得,做戲都ok架喎! 喺萬聖節嗰陣,我哋就搵咗Carmen同另外3位男女神拍咗條短片,Carmen仲即席跳咗段”Sugar Baby” ,現場工作人員當時仲一致讚好架! 錯過咗唔緊要,一齊嚟重溫番丫!

恭喜Carmen!

「2015年度人氣男神」第1位

聖類斯爆肌男神 – 喬駿

5648

混血同肌肉,好似真係比較得人歡心,Calvin 喬駿仲要兩樣條件都有齊,可以成為「2015年度人氣男神」嘅第1位,應該唔會令人覺得意外啦! 靚仔、健碩,又有運動細胞,可以冧盡網民,但係更值得一提嘅,Calvin好得佢母校聖類斯中學校友嘅支持,佢嘅訪問一出,就喺聖類斯嘅社區群組上瘋傳,佢可以勝出,呢股聖類斯勢力,都實在幫咗唔少忙架!
5565
Calvin爸爸係尼泊爾人,10歲嚟香港定居之前,一直都入讀主流學校,佢講廣東話嘅流利程度,根本就等同一個地道香港人! 精通兩文三語,矢志就係要做飛機師! 嘩~ 靚仔到咁,仲要做埋飛機師,真係「Cool魔」都要行埋一邊啦!!

 

好喇! 多謝大家肯花時間睇到嚟呢度,「2015年度學界男女神頒獎典禮」,嚟到呢度都接近尾聲喇! 過去一年,總共有12個中學生,39個大專生成為「學界男女神」,喺2016年,希望有更多嚟自唔同學校嘅靚仔靚女上嚟挑戰,挑戰你嘅自信! 挑戰你嘅才能! 挑戰你嘅個人潛能! 出年見!

 

撰文:Joanne

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。

更多精選內容