悠閒慢活 中上環
田園巷中歎Pancake
嚟得呢度，除咗係為電影《分手100次》取景地之外，十居其九都係為咗佢個Earl Grey Pancake，因為真係坊間少見！先係口味獨特，揀茶嚟做口味，少啲工夫同功力都會失手，難怪賣過百蚊一份都大把人食；可自選三款toppings，pancake 仲要厚砌三大塊一齊上，分量絕對不止下午茶級數！整番杯Earl Grey 熱茶就真係絕配。
3rd Space
營業時間： 11am-7pm（周一至周五）、9am-6pm（周六及周日）逢周四休息
地址： 普慶坊22號A太慶大廈地舖
電話：2547 4149
型格古早味餐廳
以懷舊及復古為題的Oldish，上環及觀塘兩分店，上環是元祖店，未入門口先係見到一幅紅磚牆已經raw 味盡現，門口設有矮櫈方便大家傾偈打躉或逗狗。入面發現似足外國的家居，裝飾粉飾得像五、六十年代的環境，當年的傢俬雜物如收音機、電影海報及搪瓷等好有氣氛。店內all day breakfast 百四蚊起，咖啡四至五十蚊一杯，hea足半日，抵番晒啦！
Oldish
營業時間：10am-10pm
地址：東街53號地舖
電話：2697 3313
下頁：另外兩間cafe介紹
斜巷中悠閒café
辦館，一個已跟時代脫節的名字，用來作為café小店的名字，華洋文化的落差造就了這小店。咖啡小店呈L型，原址原來真的是個辦館，門口枱後那銹跡斑駁的大鐵閘，已成為特徵；裏頭有個私隱十足的小房，一室都很舒適悠揚，甚至連音樂也懶播，乾脆聽門外鳥兒吱吱喳喳。拉麵、三文冶、蛋糕及多士等都有供應，咖啡、梳打及茶款款精美。不少藝術家索性在門口大枱打躉半日，對着鳥語花香的小街，不怕沒靈感吧？
Lof 10 辦館
營業時間：10am-7pm
地址：上環裕林臺1號B舖
電話：2540 2210
喫茶專門店
呢間「茶•家」在POHO 區內冇人唔識。叫佢做café嗎？但佢又冇賣咖啡，事關佢係一家專賣特色茶嘅茶店。中、西新式fusion 茶款幾特別，花茶、香草茶及泡茶，推介易入口的泰式奶茶，較港式淡茶味，易入口不過甜；而喜歡特別口味的，可試印度奶茶，濃濃薑味又帶陣陣羶油味，好獨特！配多件綠茶芝士蛋糕更是perfect match，好滿足！
華麗古物小店
太平山街不時會有周末市集，當中呢間小店InBetween 係搞手之一，喺店舖門口空地擺檔， 亦好有心地為本地設計師寄賣特色手作。店子雖小，但收藏品卻多多，好多女士最愛嘅華麗小物都有得賣，如絲巾、墨鏡、耳環、戒指等，一百幾十蚊就有條精美頸鏈。店內剛好播出《多啦A夢》電影原聲黑膠碟，原來門口仲有一大堆電影黑膠碟，影迷們唔好錯過！另外，老闆泊喺門口架復古車，絕對係影相靚位！
InBetween
營業時間：12nn-7pm
地址：上環太平山街6B號
電話：9677 7815
古董夜冷店尋寶
PMQ 後的一條橫街，有間小店專賣古董店隱身於街頭，古董玩意包羅萬有，由五十年代起的玩具、學校功課，甚至港英政府的官方物品都有，而最騎呢要數滙豐銀行個鐘都有得賣！對於愛好舊物的人來講，這裏是個藏寶庫，店內不時有外國遊客入來尋舊香港，亦有不少中年人士入來尋回美好時光。男士最愛的復古鈕扣、八毫米攝錄機及黑膠唱片，女士們就當然是耳環及手袋等，唔會開天索價，一百幾十都有交易！
土炮皮革新分店
文藝青年小店，點可以冇皮革呢？上環區內最新開嘅兄弟皮革，係本地口碑唔錯嘅皮革店之一，新店開喺上環，為港島區內皮革愛好者提供多一個入貨點，而店內皮革用品及工具價錢一律不變。店內有開班教學，可以約埋老友一齊嚟上堂，除咗有現成嘅製成品外，大家亦可買預先打孔嘅套裝返屋企DIY，有咩唔識可以喺Facebook 問店主，店主超nice 有問必答呢！
Brothers Leather
營業時間：11am-8pm
地址：上環普慶坊50號
電話：5122 3474
下頁：3大散步推介
3大散步推介
尋街頭小巷塗鴉畫
逛完小店，呷過咖啡後，係時候尋找區內的牆畫，逐個打卡了。單是上環太平山街、普慶坊、西街、四方街及荷李活道一區內的大街小巷，大大小小幾乎有十多幅，最主要的都集中在太平山街轉角及水池巷的樓梯，當中有型格、有可愛，絕對是打卡自拍熱點。如果想搵最上鏡、最夠地標性嘅一幅藍天與唐樓，要去到PMQ 附近嘅嘉咸街啦！
差館上街與西街之間小巷
四方街與水池巷交界小巷
下頁：PMQ樓梯畫、卜公花園
PMQ最新樓梯畫作
講到藝術畫作，PMQ最近亦有新活動搞，今次名為「Hong Kong On Steps 」嘅活動請來本地、台灣、法國及日韓等七國藝術家，為PMQ 的廿條樓梯注入生命力，俯身彎腰一筆筆添上色彩，由平平無奇的石級搖身一變至步步都色彩斑斕，吸引人們駐足停留或影相，今後去PMQ 掃樓唔使等LIFT啦！
PMQ 元創方
日期：即日起至4月初
時間：7am-11pm
地址：中環鴨巴甸街35號
電話：2811 9098
卜公花園恬靜宜人
今日的卜公花園，百多年前本是民房，後因鼠疫被港英政府夷為平地，改建成全港首個為華人而設的公園，當時種植的數棵細葉榕，如今已高近廿多米，為街角遮風擋雨。如今公園倒是閒適，除了籃足球場外，亦劃出幾千呎花園供遊人閒逛休憩。行到入去坐一陣，感受鳥語花香，舒展筋骨，的確心曠神怡。
卜公花園
時間：7:30am-10pm
地址：普慶坊與居賢坊交界
電話：2853 2563
撰文：Pan
編輯：Heidi Lau
攝影：黃大立
Model：Inez@Starzpeople、Michelle Fan
