超盡興的東華慈善嘉年華

超盡興的東華慈善嘉年華

又嚟到我地聖誕假期我地做過乜?緊係又去玩啦,相約仁叔叔同SY哥哥去東華慈善嘉年華大放電呀!

 

一入到場兩位小朋友就已經急不及待咁話要咩…傾下玩邊樣先,就咁睇地圖又真係幾多嘢玩,難怪佢地要傾咁耐~
DSC00060

 

不過….其實我地兩個大人一早已經決定左,第一時間就係去挑戰「超級紐約滑梯」呀!

 

之前睇宣傳介紹話要高過120CM先可以玩,所以我地仲傾好左分批玩,以便睇住兩個小朋友。點知原來係可以同小朋友坐埋一齊瀡,我當然係非常樂意依個安排啦~
DSC00068

 

其實整個滑梯都有差唔多六樓嘅高度,坐係上面等瀡嘅時候都有啲啲驚,不過玩落又真係唔驚,因為過左第一個波浪之後,過左嗰一個離心力之後就完全唔驚啦~
DSC00096

 

睇小小豬笑得咁開心就知有幾好玩啦~
DSC00104

 

依個唔識驚嘅小小豬仲話要陪仁叔叔玩多次,所以佢又可以連玩兩次,都真係興奮到頂點呀!

 

之後我地就轉戰大型彈彈,其實依個彈彈床同我地之前去Sanrio Family Sports Day玩嗰個應該係完全一樣,唯一唔同就係今次只可以小朋友入內玩。

 

有得自由地任跳入爬,兩位小朋友緊係勁開心啦~
DSC00243

 

仲要有「陀飛輪」做背景,係有氣勢啲呢…哈哈哈~
DSC00354

 

之後我地轉戰「纽约滑梯」~
DSC00368

 

依個可以話係小小豬期中一個期待遊戲,因為佢啲PEPPA PIG其中一個故事係有玩依個,所以佢要同PEPPA齊齊玩,依個又點會難到唔識驚嘅豬仔呀~
DSC00381

 

一連玩左幾個刺激遊戲,係時候文靜啲啲,坐下船仔啦~
DSC00419

 

再去玩幾個攤位遊戲,當然….我地又係失敗,嬴唔到獎品啦~
DSC00451

DSC00461

 

小小豬見到個轉轉鞦韆又話想玩, 不過我有理由相信佢係因為有隻BEAR BEAR陪玩先想玩,依個傻豬仔初時仲扶住BEAR BEAR一齊轉,最後負責姐姐開咪叫佢放開公仔先肯放手呀~
DSC00486

DSC00496

 

見到咖啡杯當然又想玩啦,今次仲係可以大人陪,我又借機玩下先。不過….原來同迪迪尼嗰個係唔同,只可以圍住轉,唔可以自轉,當場……..有啲啲失望添~
DSC00523

 

場會中有一個哥爾夫球場,雖然兩位小朋友都唔識玩,不過我就建議入去玩轉,亂咁嚟試下等佢地接觸哥爾夫係乜東東都好呀~
DSC00601

 

小小嘅沙地,佈置成海賊模樣,依難度分大約十級有十個洞。一如我所料….小小豬都係亂咁嚟,最後仲索性用手入洞,真係俾佢激C。不過算啦,見兩個小朋友都玩得咁開心,小小豬跟住SY哥哥玩完一轉又一轉,所以放過佢啦~
DSC00556

DSC00590

 

終於就去小小豬嘈左好耐要去嘅「兒童創意動感區」,因為榻整個場地都係可以駕車,啱最車仔控嘅小小豬呀!

 

 

基本上之前玩嘅遊戲都唔係點要排隊,今日唯一大排長龍嘅就係依個小小賽車手,我地排左差唔多半個鐘有多先可以玩到呀~
DSC00632

 

渣住部電動車圍圈行大約六分鐘,唔知係唔係因為DADDY關係,小小豬特別鐘意渣車,佢仲渣得非常安全…….好慢呀……哈哈哈~
DSC00666

 

另一個小小豬樂而忘返嘅地方就係依個HotWheels鬥車場,只要俾$50入場就可以拎一部HotWheels車仔份入面任玩一個鐘~
DSC00673

 

場內最特別係有一個高天台,等小朋友將車仔衝落去,睇下邊部HotWheels最利害。小小豬來來回回都走左唔知幾多次,平日叫佢執嘢都冇咁快,一見部車仔衝左落地就極速咁落嚟執~
DSC00677
DSC00678

 

另外都有好多唔同大小嘅HotWheels小裝置,俾小朋友們鬥車一番呀~
DSC00674
DSC00725

DSC00753

 

場內都設有啲小凳俾小朋友企高玩,又幾貼心哦~
DSC00675

 

兩位小朋友唔覺唔覺係入面又玩左差唔多一個鐘,所以話…車仔對小朋友(尤其男仔)嘅影響力真係唔可以睇少呀!

 

又俾小小豬見到遠處有得玩渣車車遊戲,雖係只係較輕量級嘅豬仔車,不過小小豬都一樣玩得何其高興呀~
DSC00772
DSC00768

DSC00786

 

嘉年華又點少得充氣遊戲呢,小小豬又點可以唔入去玩番轉~
DSC00800

DSC00822
DSC00803

 

玩左成日刺激嘅遊戲,最後一樣玩靜靜地嘅「MegaZoo」啦~
DSC00844

 

入面有個大型嘅積木池俾小朋友任玩,佢地仲好細心設有兩個場地,咁就可以將大小朋友分開玩,安全啲嘛~
DSC00847

 

另一個大池就真係幾大,真係完全任玩。而且仲有哥哥姐姐陪你玩添~
DSC00848
DSC00881

 

今日哥哥仲教小朋友砌蝴蝶添~
DSC00883

 

其實係因為有一個砌積木比賽, 既然一場嚟到當然又玩下啦~
DSC00853

DSC00887

 

估唔到依個「兒童創意動感區」我地一玩就玩左差唔多三個鐘,真係由天光玩到天黑,小小豬話係入面玩得係最開心呀~
DSC00895

 

其實我地今日睇見東華慈善嘉年華都仲有好多遊戲係準備緊,好似小小豬想玩嘅過山車同埋碰碰車都未開,加上今日佢又係「兒童創意動感區」玩得咁盡興,所以應該會係三月尾嘉年華結束前,同小小豬再入嚟玩轉啦!

更多精選內容