果皮清蒸鮑魚仔

專欄

廣告

元旦日難得一家人齊齊返屋企食飯,緊係要食好啲…食豪啲,所以今日其中一個餸就係….果皮清蒸鮑魚仔。

 

其實依家啲鮑魚仔比之前買都真係平左好多,大大粒都係$100一斤,有啲細粒啲都只係$80,所以都真係幾抵呀!

 

買齊材料就可以開工啦~

 

果皮浸透去囊,然後切絲。薑切絲備用~

 

蔥及芫茜就切碎,最好有咁碎時得咁碎~

 

先將鮑魚去內臟再用牙刷清洗乾淨,依個工序可以話係最辛苦因為每一隻都要擦擦擦,擦的乾乾淨淨先得。記得連埋個殼都要洗,因為洗乾淨之後,放返粒鮑魚落去一齊蒸~

 

將啲鮑魚肉放返入殼之後,就可以將果皮及薑絲放上鮑魚面上~

 

續下頁

待水滾下蒸鍋隔水蒸五至八分鐘(視乎鮑魚嘅大少)~

 

另一邊就開始煮個熟豉油,先用油爆香啲芫茜及蔥碎~

 

之後加啲蒸魚豉油煮滾~

 

待蒸好鮑魚仔,再倒入熟豉油~

 

一碟好味嘅果皮清蒸鮑魚仔就出爐啦~

 

啲鮑魚勁鮮甜嫩口,啖啖肉之外再加上埋個熟豉油,真係絕配呀!

 

簡簡單單嘅煮法就可以煮到一碟大家都讚好味嘅餸,又可以等我扮下大廚啦,真係好有自豪感呀!