青紅蘿蔔印度椰子瘦肉湯

青紅蘿蔔印度椰子瘦肉湯

嗰日係果欄買印度椰子時,店長姐姐俾左幾個印度椰子嘅湯水食譜俾我,既然買左咁多粒返屋企,緊係密密煲佢唔好浪費嘛,所以就買齊材料,煲返個青紅蘿蔔印度椰子瘦肉湯潤返下先得!

 

青紅蘿蔔湯我就成日都煲,因為老公係好鐘意飲依個湯,作為一名間歇性嘅賢妻,有時候都係要投其所好嘛!

 

青紅蘿蔔再加埋印度椰子會係啲咩味?青蘿蔔本身個味都係幾濃,一齊煲又會唔會蓋晒印度椰子?我真係滿腦子疑問。

 

不過….自故成功在嘗試,再加上店員姐姐俾得我都應該係信得過,所以就唔理咁多,買齊材料試下啦!

 

材料包括有印度椰子一粒、紅蘿蔔及青蘿蔔各一條、豬肉眼約$40、南北杏約一湯匙~
IMG_8719

 

先將印度椰子切片,青紅蘿蔔切塊~
IMG_8721

 

洗乾淨南北杏,瘦肉洗淨汆水備用~
IMG_8722

 

煲內放約1.5L水(約有15個飯碗左右啦),然後隨水將所有材料加入~
IMG_8723

 

待水滾後慢火煲約2小時~
IMG_8733

 

最後加少少鹽調味就飲得啦(由於青蘿蔔本身都係濃味,所以真係唔洗落太多鹽呀)~
IMG_8742

 

其實我都有一刻擔心個青蘿蔔味會蓋晒印度椰子,但一飲落又即刻解除左我個擔心,原來佢地兩個係好夾嘅朋友嚟,啖湯除左有好香嘅椰子味之餘,都仲有青蘿蔔獨有嘅甜味,總之都係嗰句:好好飲呀!(哈哈哈…又有人唔知醜….自己讚自己啲湯!)

更多精選內容