前高官馬時亨 遠離腦病變fit馬

前高官馬時亨 遠離腦病變fit馬

62歲前商務及經濟發展局局長馬時亨(馬sir), 因病離開官場六年,不愁寂寞,擔任多個非執行董事、教書及慈善工作,「我有好多卡片,唔知派邊張俾你,哈哈。」他選派港大經濟及工商管理學院經濟金融學院名譽教授卡片,最近亦擔任港鐵獨立董事委員會主席,查港鐵超支事件,曝光率大增。當年馬sir腦部患上血管畸形症,與家人商量後決定辭官,「唔係好大件事,但要好注意健康,唔好血壓高、壓力大,所以我就離開官場,跟住減磅,希望由肥馬變做fit馬。」他透露最新健康狀況,「依家身體非常好,當年遇到嘅問題,其實已經消失晒。」fit馬享受做公職,閒時與太太行山,與兩個女露明和露玲的溫馨生活,無
意重返官場。

1
馬時亨出身貧窮,家住板間房,憑着自己努力當上局長,但他沒有忘本,時刻教兩個女緊記爸爸的背景,明白幸福得來不易,「我帶番佢哋去我細個住嘅地方,係點樣嘅板間房,要知道佢哋出世時已經好幸福,感恩所擁有嘅生活。」

與曾志偉飲茶打golf

眾所周知,馬sir是曾志偉的表哥,情同手足。馬sir十歲喪父,家境清貧住板間房,身為大哥的他還要照顧弟妹,全靠志偉爸爸曾啟榮經濟援助及關心,才能完成大學學業,他曾說沒有舅父,就沒今天的他。後來他做了局長,舅父引以為榮。馬sir與志偉一家感情深厚,「我同志偉好close,自細玩到大,依家好多時一齊飲茶傾偈,今朝先見完咋嘛!有時會打golf,不過最近少啲,佢忙到不得了。」 志偉僅細馬sir一年,兩人加埋百幾歲,但溝通方式追得上潮流,馬sir說:「我哋好先進㗎,好似年青人咁,用WeChat約飲茶,喂喺電視見到你喎,最近做緊咩呀?佢又話你最近夠忙啦,搞港鐵啲嘢,我知㗎喇,得閒出嚟飲杯茶啦!」

等國祥結婚請飲
志偉四子女中,馬sir與表姪女寶儀感情最好,「寶儀由出世第一日開始,我就見到佢,由細睇到佢大好好感情,所以我兩個女結婚佢都有嚟。」至於曾國祥,馬sir指數年前曾訪問他,「我主持清談節目《以時相聚》(與林以諾牧師主持),佢同志偉一齊受訪。」志偉在節目中乘機取笑兒子緋聞多,叫他「滾少啲」!不過國祥與《M Club》「少女李麗珍」王敏奕的新戀情,馬sir就沒過問,「係咩?唔知喎,到佢拉埋天窗實會請我飲啦,唔使緊張!」馬sir與志偉成日見,但兩家人的年輕一代較少接觸,他對此很豁達,「我哋唔可以因為有親戚關係,要迫年青人一齊,由佢哋自然發展,佢哋嘅圈子唔同,所以冇咁多機會接觸,好似寶儀大過Christine,佢喺娛樂界發展,Christine唔係,但Christine結婚,志偉佢哋都嚟㗎,大家一家人參與,好高興。」

3
Christine於2011 年結婚,至今仍享受二人世界,父母不急於抱 孫,年青人自有盤算。

 

搞笑爸爸愛唱張學友
無官一身輕,兩個女幾年前亦先後出嫁,馬sir閒時最喜歡約親朋飲茶,與太太行山為樂,「我哋兩個相依為命,相處時間多咗,做政府嗰時,真係冇時間一齊,連食飯都要經秘書約,依家就冇呢個問題喇。」馬sir面對工作一臉嚴肅,返到家中是一位歡樂爸爸,「我見到兩個女都溶咗啦,仲點嚴肅吖!」大女Christine指爸爸其實為人搞笑,最鍾意唱歌娛樂家人,馬sir謙稱只有幾曲走天涯,不能與學友相比,「首首歌喺我口中唱出嚟都唔好聽嘅,哈哈。」官場歌神周一嶽,憑一首〈忘不了你〉紅爆網絡,可以即場唱兩句較量一下嗎?馬sir耍手擰頭,「我唔想嚇親啲讀者,周醫生唱得好好多,佢好鍾意唱歌,有咁多表演機

會!」

燒雞翼最拿手
Christine又爆爸爸愛上燒雞翼,邊燒邊講步驟,一家人像睇烹飪節目,「最近我哋喺美國燒嘢食,爹哋燒嘢食好叻,佢一路燒,一路解釋佢做緊乜嘢,由醃雞翼、燒烤時要搽幾多層醬汁、幾時搽蜜糖、等幾耐轉一次、個火要幾大、燒完仲要聽我哋feedback,好似睇緊電視學燒嘢食咁。」馬sir大笑問:「咁好唔好食先?」Christine回味大讚好睇又好食!Christine與細四年的妹妹Andrea走路各異,Andrea是英國會考十優狀元,任職高盛,擅長投資,遺傳了爸爸的經濟金融才華; Christine卻選擇投身教育,雖然爸爸想她們齊齊繼承衣缽,但尊重她的決定,Christine感激爸爸的支持,「我開頭都係讀經濟,畢業後有諗過做番經濟呢行,爹哋仲想我做CNN記者,到我決定做教育時,我好需要佢嘅肯定,我好記得佢同我講,『阿女,行行出狀元,最緊要你鍾意做,就會做得好,你做咩我都會支持你。』」

創立品德學校
五年前,Christine 成立品德學校JEMSLearning House,提供全英語品格課程,例如道德觀及社交技巧等,她發覺近年家長太過追求學術,忽略了品德教育,「唔好講成功人士咁遠,即使入大學, 都睇你識唔識同人相處、有冇teamwork、領導才能、會唔會對社會有貢獻,呢啲需要自小培養。」曾有家長對她說,兒子年年考第一,但不懂溝通和選擇朋友,Christine說:「去

學校interview,你唔識同校長老師溝通、唔識同其他小朋友玩,interview好輸蝕。」Christine小五六時曾受欺凌,常被取笑和搶玩具,「以前覺得好大件事,但收埋冇同父母講,大個先識講番。」她發覺校園欺凌愈來愈普遍,決定加入相關課程,「有個11歲女仔成日蝦人,上完一年課後,成個人改變晒,佢話蝦人係因為自卑,覺得哥哥姐姐叻過佢好唔開心,所以透過欺凌令人一齊唔開心。佢認清楚咗自己身份後,知道自己係unique,唔需要跟從哥哥姐姐,成個人開心晒,仲幫番被蝦嘅同學。」

培養品格需時,Christine 堅持開辦一年制課程,「品格同價值觀唔係幾日就改到。」
培養品格需時,Christine 堅持開辦一年制課程,「品格同價值觀唔係幾日就改到。」

做人要感恩積極
每逢學校舉辦大小活動,馬sir必定坐第一行支持,「每年年尾我哋會搞畢業典禮籌款,上年呢個時間佢要去韓國,出席好朋友個女嘅婚禮,佢24小時內去完韓國飛返香港參加我個event,改晒機票同行程,咁急都要嚟,佢係想我知道,佢真係全support我做呢樣嘢。」Christine五年的教學路上,被父母影響至深,「喺爹哋身上,我學到待人處事應有嘅態度,佢強調要對身邊人好,佢好記得一班朋友點對佢好,會答謝朋友、知恩圖報;而且佢做每件事都好積極,好似近期港鐵超支事件,我哋夜晚食完飯,佢再返去睇paper、開會,佢知道要對得住香港市民,要擺個心做好每一件事。」

15
馬sir 以行動支持女兒辦學,每逢有學校活動,必定坐第一行參與,令她非常感動。

 

●撰文:Ling

●攝影:黃大立(部分相片由受訪者提供)

 

 

 

更多精選內容