轉眼就生喇

原本應該在懷孕中期開始分享，因為忙更因為懶，拖到放產假才施施然寫……

 

現在懷孕已接近39周，BB隨時要來了！
回顧孕期算是陀得舒服，完全無嘔過，不知跟頭三個月睇中醫安胎有否關係。
只是初期胃口麻麻，其實那段時間經常肚餓，但一見到食物又沒胃口，好矛盾。

 

如果話最慘應該是22周時，因荷爾蒙變化而爛嘴，上下唇生滿唇瘡，加上耳仔痕、手痛，睇完西醫再睇中醫，不過作用都不大，主要靠自己的抵抗力慢慢痊癒。

 

爛嘴最辛苦，不斷爆水泡，又腫又痛，無覺好瞓。最初礙於儀容影響心情，之後已經不顧儀容，只想盡快好，在無得搽藥膏下，輾轉兩個月先慢慢好。

 

我好想問︰「點解我會爛嘴？」
中醫好似聽到我的心聲︰「唔好問點解，個個大肚婆嘅反應都唔同，好似有啲人嘔得好犀利，你又無吖……」
確是聽過很多媽媽及準媽媽分享，有人嘔足4個月，有人長期頭暈、食慾不振，有人全身痕……跟她們比起上來，我算是很幸運。

 

在懷孕初期，朋友和婦科醫生已經提醒我要搽妊娠紋膏，否則容易「爆肚」。在3個月後我開始乖乖地早晚都有搽，以為可以「平安過度」，怎知7個月時妊娠紋悄悄在肚底出現，最初頗為沮喪，不過回想起來，可能是自己搽得不夠仔細，甚至忽略了肚底位置。

 

4個月至7個月我搽chicco的妊娠紋膏（朋友懷孕時用剩，為免浪費我接力搽）。膏狀質地搽後快乾不黏膩，皮膚容易吸收。

7個月妊娠紋出現後，剛好妊娠紋膏搽完，我開始轉用Bio-Oil。有幾位朋友都推介這支油，所以我就直接選用。最初因油狀質感造成黏笠感不太習慣，但後來秋冬到似乎能滋養皮膚，至少我的妊娠紋沒有擴散。