中年好聲音3｜趙浚承奪98分兼MVP 觀眾憑一個「獨特安排」直指造馬
獨有結婚片「成長片段」段惹熱議
趙浚承嘅表演喺網上掀起熱烈討論，不少網民質疑為何8位選手只有趙獲安排喺表演時播結婚片段，在節目討論區不少網友質疑TVB安排偏心，點解淨係趙浚承有呢個「獨家」待遇？有網友怒斥：「8位選手，點解得佢一個有結婚片段播？黃博老公都有喺現場，點解唔提？公平喺邊？」亦有人揶揄佢高音似「嗌」出嚟，笑言：「日後入娛樂圈要老婆日日跟出跟入啦，唔係點唱歌呀！」甚至有網友提議節目改名《中年好老公》，話帶老婆出場就攞高分，質疑比賽淨係睇「感情牌」。
網民直指待遇「 大細超」欠公平
除咗公平性爭議，趙浚承嘅實力亦成為網友狙擊對象。有人批評佢唱功「平板」，全靠「靚仔同賣親情牌」先入決賽，仲話佢高音全係「嗌」出嚟，毫無技巧可言。有網友直指TVB「造馬」離譜，話全晚只有趙浚承嘅編曲正常，其他選手嘅歌慢到「聽得辛苦」，質疑評審刻意加分，諷刺話：「造馬！應該畀超過100分啦，各評審有膽做大佢！」甚至有網友借用「卡通𠄘」呢個稱呼，暗諷整件事誇張得似卡通，反映網友對TVB安排同趙浚承高分嘅強烈不滿。
老婆現場打氣 評審感動落淚
其實今回合比賽，趙浚承老婆首次現身現場撐場，畀佢無限動力！佢唱《Forever Love》時感情爆棚，高音清亮無瑕，背景播出嘅結婚片段仲將佢同老婆嘅愛情故事娓娓道來。表演真摯到連肥媽、海兒同王馨平都喊到眼腫，離婚兩次的張佳添都忍唔住讚：「你差啲令我重新相信婚姻！你遇到一個咁值得愛嘅女人，我好羨慕你！」
「你今日使咗『降龍十八掌』，簡單真摯，直擊我心！」——王馨平
肥媽讚 「一開口就feel到你係同老婆講心底話」，海兒亦心心眼表示讚佢毫無保留，似係將呢場當「最後一擊」，將所有感情注入歌入面。有fans讚佢狀態「神級」，話佢用倒敘法重新演繹《Forever Love》，甩開王力宏影子，唱出自己嘅故事，98分絕對實至名歸，留言話：「現場聽真係震撼，唱完全場high爆！」
