洗校服貼士｜針對4種污漬 低成本調味料甩走油漬 校服保持雪白乾淨

校服去污攻略：針對4種污漬的處理秘訣

洗校服貼士｜灑鹽去肉汁漬點

小朋友食飯時最易濺到深色肉汁係淺色校服上。如果污漬未乾，立即用凍水沖洗背面，讓水流將污漬推出去，之後用溫和洗衣粉輕輕揉搓。如果污漬已經乾透，可以先用水浸濕，然後撒上少少食鹽輕輕擦洗，鹽粒可以幫助吸收油脂同色素，之後再用洗衣機清洗。緊記：千祈唔好用熱水，否則蛋白質凝固咗，污漬就會永久留低啦！

洗校服貼士｜甩走發黃汗漬全靠梳打粉

運動完嘅校服成日有黃色汗漬，特別係衫領同腋下位置。天然又溫和嘅梳打粉就係你嘅好幫手！用暖水溶解一湯匙梳打粉，將校服浸泡幾個鐘（過夜效果更佳），之後正常機洗就得。梳打粉唔單止可以去除異味，仲有輕微漂白效果，令白色校服恢復亮白。

洗校服貼士｜檸檬酸急救原子筆漬

做功課時不小心畫到校服？唔使慌！切開一個檸檬，直接擠汁喺墨漬上，用舊牙刷輕輕擦拭，然後用凍水沖洗。檸檬酸可以有效分解墨水成分，而且天然唔傷衣物。如果墨漬較頑固，可以重複幾次呢個步驟。

日本洗衣專家2款材料輕鬆刮走污漬

此外日本洗衣專家片木徹也在獅王LION的LIDEA品牌的Blog入面曾分享去原子筆漬及墨汁的貼士。片木先生教大家製作「米飯粒清潔劑」，再配合2步甩走筆漬。

製作「米飯粒清潔劑」

將梅乾大小的米飯粒與5-6滴液體洗衣劑混合，調製成「米飯粒清潔劑」。

用米飯粒清潔劑2步甩走筆漬

Step 1:塗抹製好的清潔劑
將「米飯粒清潔劑」仔細塗抹在原子筆墨水沾染處。

Step2：刮除污漬
隨後使用裁縫刮板或塑膠湯匙等工具，順著布料織紋方向刮除污漬。

洗校服貼士｜洗潔精去油漬

早餐食腸粉或者午餐食飯時沾到油漬？立即將洗潔精直接塗在油漬位置（記住係未過水前），輕輕搓揉後靜置20分鐘，讓洗潔精分解油分，之後用清水沖洗再放入洗衣機。洗潔精專為分解油脂而設計，效果比普通洗衣粉更顯著！

洗校服保養4心得

1.每次洗衫前記得檢查衫袋，清除紙巾同雜物

2.深淺色校服分開洗滌，避免染色

3.繡有校徽嘅部位反轉清洗，可以延長標誌壽命

4.冬季厚外套建議定期專業清洗，保持保暖功能

資料來源：僱員再培訓局-樂活一站