Twins 25週年粉絲見面會｜阿Sa呼籲fans勿忘初心 社恐阿嬌零怯場狀態大勇

好友湯怡神秘現身送蛋糕 經理人霍汶希到場見證

這次「TWINS 25週年1314新春限定粉絲見面會」絕對是誠意滿滿，開show前已有驚喜連連。向來疼錫Twins的經理人霍汶希（Mani）當然有到場支持，見證兩個女的重要時刻。而更令人意外的是，湯怡（Kathy）亦神秘現身，親自送上祝賀二人25周年的特製蛋糕，認真有心思。場內更展出了八套二人歷年來的經典舞台服裝及頭飾，讓fans可以近距離瘋狂打卡，每個細節都充滿回憶殺。

農夫擔任MC炒熱氣氛 五首經典歌曲high爆全場

這次FM找來好友「農夫」擔任MC，絕對是最佳人選。期間，Twins唱出《發夢見過你》、《你最紅》、《孖寶668》、《相愛25年》及《忠粉》五首歌，又邊唱邊落台跟fans作超近距離接觸，全場high爆到不得了！之後又跟fans玩估歌仔、寫揮春遊戲、不同組合的合照及全場大合照，互動環節豐富到極點。唱完《忠粉》後，台下fans舉牌點歌，Twins即時開啟寵粉模式，阿Sa笑說：「好啦，每首唱少少啦。」隨即加唱《雙失情人節》、《黑色喜劇》、《冬令時間》同《天對地》，絕對福利滿滿。

阿Sa肉麻表白fans最勁 全場默契嗌名升溫氣氛

現場播放二人「成長」片段時，當看到以前頒獎禮片段，阿嬌感觸地說：「好多回憶呀。」阿Sa則笑說：「好搞笑呀睇返啲頒獎禮嗰啲片，嗰陣時啲鏡頭會拍到你哋㗎嘛，我真係覺得你哋好勁，打鑼打鼓，哈哈。」阿嬌和應：「係呀，成場都係你哋把聲。」阿Sa即時肉麻表白：「其實全場其他歌手啲fans都好勁，但我覺得你哋真係最勁！令到我哋好有面子啊，哈哈。」粉絲即刻自動波吹BB，全場歌迷更好有默契地嗌阿嬌阿Sa，氣氛即時升溫到最高點。

蔡卓妍呼籲fans勿忘初心 要搵返當年追星熱情

阿Sa指十分喜歡這種形式見面，還趁機叫fans找回當年的熱情：「我覺得呢幾年都弱咗少少囉你哋，哈哈。」阿嬌和應，更着fans「要搵返個Passion。」阿Sa續說：「你哋要保持個初心㗎嘛！好似我哋咁！要保持個能耐、保持個精神。雖然你哋個年紀、我哋都係啦，大家越嚟越大，但係都唔可以『老兀兀』咁樣㗎嘛，我喺台度都唔會嗚⋯⋯ 咁㗎嘛。」她更分析可能以前沒有電話，大家才能十分投入，然後又問：「可唔可以變返以前呀？」全場即時大叫不停，阿Sa最後話：「嗱，以後記住我哋去到邊度都要咁呀，勿忘初心呀。」

鍾欣潼自爆有社恐今日零怯場

臨完場前，二人分享感受時更顯真情流露。阿嬌先說：「首先好多謝大家一路以嚟咁支持我哋，有一啲二十五年一直喺度、有啲係新嘅、有啲係中間加入，雖然我哋唔係成日都可以見面，但係我哋都會成日掛住大家，所以希望以後多啲呢啲線下嘅活動，等你哋唔好咁望穿抽水。」隨後更自爆有社恐，太接近人會緊張：「但係今日我冇，呢個場地真係好warm，我今日完全冇怯場、冇緊張、非常好。」而阿Sa坦言出場前十分緊張：「雖然開演唱會都好緊張，但呢個係fans meeting， suppose就係同啲最熟、最friend嘅fans一齊見面，但唔知點解好緊張，可能係好耐冇見，亦都可能係咁樣嘅形式嘅fans meeting真係第一次。平時開演唱會，你哋係好遠，但呢度大家係好close，所以可能因為係咁樣就有少少緊張，所以好多謝大家今日嚟到呢度同我哋一齊玩。」