愛回家｜安凌CP合體參加「單身落地獄」！抽水《單身即地獄》劇情神還原

Apr 27 2026

TVB王牌處境劇《愛·回家之開心速遞》向來以緊貼時事、幽默「抽水」而深得觀眾喜愛，基本上係晚晚送飯必備！今次編劇又再次發功，將目標瞄準早前紅遍全球的韓國戀愛真人騷《單身即地獄》，創作出港版「單身落地獄」，更搵嚟人氣CP「安凌」周嘉洛同吳偉豪合體做主角，單身狗為求出pool竟然要去到「落地獄」？劇情諷刺又爆笑，即刻引起網民熱烈討論！

安凌CP被嫌棄無戀愛經驗決心參加真人騷求突破

故事由金城安（周嘉洛飾）同朱凌凌（吳偉豪飾）拍攝功課講起，兩人正為一場表白戲份而煩惱。點知同場女演員竟然當面質疑：「點解表白完冇錫錫場面？」更直指安仔同凌凌單身太耐，完全缺乏戀愛經驗，搞到成場戲勁尷尬！被踩中痛處嘅兩人，為咗證明自己、兼吸收戀愛養份，竟然聽從提議，報名參加一個名為「單身落地獄」嘅戀愛綜藝節目，誓要脫單兼學嘢！

「單身落地獄」期待變驚嚇安凌CP驚覺中伏

安仔同凌凌原本滿心歡喜，以為可以喺節目中同年輕貌美嘅女嘉賓擦出愛火花，點知成功入選後先發現完全係另一回事！節目組嘅安排處處透住古怪，嘉賓質素亦同想像中差天共地，令佢哋大失所望，驚覺自己「中伏」。正當兩人想抽身離去之際，卻因為某些原因被逼留低，一場本應充滿粉紅泡泡嘅求愛之旅，瞬間變成一場難以脫身嘅噩夢。

安凌CP化身花生友冷嘲熱諷參賽者搏出位

既然走唔甩，安仔同凌凌索性改變策略，由參賽者搖身一變成為「花生友」，抱住置身事外嘅態度完成拍攝。佢哋喺鏡頭後冷眼旁觀，對其他參加者為求配對成功而做出嘅各種誇張、甚至係肉麻嘅行為大加冷嘲熱諷，抵死嘅對白句句到肉，完美演繹咩叫「食住花生等睇戲」，為劇情增添大量笑料，亦諷刺咗現今戀愛真人騷為求收視嘅劇本化操作。