Protected: 換季皮膚又乾又癢？藥劑師解構3大有效護膚成分，教媽媽揀高CP值修護神器！

香港天氣出名潮濕多變，時濕時乾，加上媽媽們日常又要處理家務、又要照顧小朋友，好多時唔單止自己，連屋企人嘅肌膚都好易出現「乾、癢、紅、繃、暗、粗」呢6大乾敏狀況。面對市面琳瑯滿目嘅護膚品，到底點揀先真正有效？買貴嘢就一定好？今次我哋就邀請到陳彥廷藥劑師，為各位媽媽拆解揀選修護產品時必睇嘅「關鍵成份」，幫大家輕鬆解決全家嘅肌膚煩惱！ 陳彥廷藥劑師專業拆解：認清3大「高效修護成分」KO轉季危肌 陳彥廷藥劑師指出，要解決唔同嘅皮膚問題，最緊要係要「對症下藥」，了解皮膚真正需要啲咩。以下3種常見膚況，其實只要認清相對應嘅修護成分，就可以精準解決問題！ 膚況 1：敏感泛紅肌（容易受天氣/環境刺激、繃緊發紅） 轉季或者遇上微塵刺激，皮膚就好易泛紅、有微刺痛感，甚至感覺好似拉住咁繃緊。呢個時候，陳彥廷藥劑師就建議要留意配方中有冇「維他命原 B5」呢個「高效修護成分」。佢有多重功效，一方面可以鎖緊水分係皮膚表層，幫助保濕，同時減退泛紅不適，另外仲可以促進肌膚組織自我修復，長遠提升肌膚嘅抵抗力。 膚況 2：濕疹/屏障受損肌（角質層鎖水力差、反覆發作、極度乾癢） 當皮膚保護屏障受損，就好似有咗缺口，內部水份會急速流失，而外來刺激物亦更容易入侵，導致皮膚反覆發炎、乾癢同脫皮。陳彥廷藥劑師拆解，「Ceramide (神經醯胺)」就係改善呢個問題嘅關鍵成份。Ceramide本身就係我哋皮膚角質層最重要嘅脂質（佔咗約50%），好比磚牆之間嘅「水泥」，能夠填補細胞間隙，重新鞏固返肌膚嘅天然屏障，做到長效鎖水同防禦外來刺激，對改善濕疹肌同乾癢肌非常重要。 膚況 3：極乾粗糙肌（乾燥起皮、摸落粗糙、缺乏彈性） 肌膚長期缺水，角質代謝都會變得唔正常，摸上手「鞋烚烚」，望落又暗沉，甚至出現乾紋。呢個時候，就要靠最經典又高效嘅抓水保濕因子——「甘油」。佢可以主動從空氣同肌底吸收水份並減少水分流失，為乾涸嘅角質層注滿水，即時改善粗糙感，令肌膚回復返水嫩柔滑。 陳彥廷藥劑師亦額外提醒，針對以上呢啲敏弱或濕疹肌膚，除咗要揀啱修護成分，亦應該盡量選擇「無香料、無酒精」嘅無添加配方，避免額外嘅添加物對脆弱肌膚造成二次刺激。另外亦可留意產品是否「無矽靈」，尤其是油性皮膚或容易生暗瘡嘅人。 Sunday Kiss小編選購貼士：媽媽必學「最高CP值」敏感肌穩膚術 聽完陳彥廷藥劑師嘅專業分析，原來想改善乾敏肌，最關鍵就係要認住「維他命原 B5 + Ceramide (神經醯胺) + 甘油」呢三大黃金修護成分！對於我哋呢班精打細算嘅香港媽媽嚟講，揀護膚品除咗要有效，更要追求「成分精準、一罐多用、高 CP 值」！ 小編就幫大家整合咗三個精明選購指標： 指標 1：是否含有黃金修護成分組合？ 選購時可以留意產品係咪同時包含維他命原 B5、Ceramide (神經醯胺)同甘油。呢個黃金組合可以直達肌底，同步做到「即時舒緩、修護屏障、長效鎖水」三重功效，全面咁照顧到唔同嘅乾敏需要。 指標 2：是否做到純淨無額外添加？ 記得要睇清楚包裝標示，優先揀選「無香料、無酒精、無矽靈」嘅溫和配方。咁樣唔單止敏感肌媽媽自己用得安心，連屋企嘅小朋友都可以一齊用，真正做到一罐搞掂全家嘅護膚需要。 指標 3：留意產品是否「無矽靈」！ 容易有暗瘡同油性肌膚嘅媽媽要留意，部分含矽靈嘅護膚品會喺皮膚表面形成一層薄膜，如果清潔唔徹底，有機會令毛孔更易阻塞，引致暗瘡增生。如果用含矽靈嘅護膚品記得每晚做好卸妝同清潔。如果偏好清爽、無膜感嘅用後感，就可以直接揀無矽靈配方。 其實市面上唔少含有Ceramide (神經醯胺) 或者B5嘅醫學修護霜，動輒都要數百甚至上千元。但各位精明媽媽只要學識認清成分，就會發現市面上其實都有提供專櫃級修護成分、但價格極之親民嘅平替選擇。只要揀啱成分，就唔需要再花冤枉錢，用平民價格都可以享受到專櫃級嘅修護效果，輕鬆告別轉季肌膚煩惱，一家大細都用得安心又放心！ （專業資訊內容指導：醫護行社區藥房註冊藥劑師陳彥廷Alice）

Protected: 換季皮膚又乾又癢？藥劑師解構3大有效護膚成分，教媽媽揀高CP值修護神器！

熱門文章

最新文章