拒追求物質 林嘉欣藝術教女

拒追求物質 林嘉欣藝術教女

育兒

廣告

形象溫柔甜美的林嘉欣(Karena),自為人母後不減清純氣質,對藝術仍充滿熱誠,更遺傳了兩個囡囡七歲的Kayla和四歲的Sofie。嘉欣從不讓女兒接觸電子產品,取而代之玩玩手作、講故事、赤腳攀爬、參觀藝術展,生活十分簡樸,亦培養出女兒不追求物質的價值觀。

嘉欣在事業如日方中之時,選擇結婚生女,停工做全職媽媽照顧女兒。今時今日,嘉欣為女兒一席話,決定繼續做喜歡的工作,嘉欣說︰「佢話媽咪你唔使日日喺屋企陪我,我鍾意你出去做嘢,因為媽咪做嘢好開心。」嘉欣慶幸自己找到喜歡的工作發揮所長,亦希望將這份喜悅感染女兒。熱愛藝術的她最近更推出兒童繪本, 把女兒的生活點滴融入書中分享開去,為女兒留下美好的回憶。

撰文:Ling
攝影:Jacy Yip(部分相片由受訪者提供)
化妝:Will Wong
髮型:Bart Choi
服裝:MSGM By I.T.、Repetto x Karena Lam(Shoes)

出繪本靈感來自女兒

早於2015年,嘉欣開始推出女兒Kayla與Sofie的系列繪本;去年她為慈善機構選用另一題材,竟然有小朋友查詢為何沒有新的「Kayla與Sofie」故事,因舊書已被翻看無數次,好希望有新書追看,嘉欣才驚覺原來Kayla和Sofie陪伴很多小朋友長大,決定聯同Kayla以生活為藍本創作新故事,並加入新角色Merry Lamb咩咩,一口氣推出六本新繪本。

「我每年嘅創作靈感都係來自兩個女,包括故事同對話,始終書係畀小朋友睇,我寫嘅角度都要由小朋友角度出發,所以用兩個女嘅故事係好貼切。其中三本關於Merry Lamb咩咩嘅故事,仲係我同Kayla一齊創作。」嘉欣說。

爸爸愛看教養書

另外兩本繪本《1到5》和《6到10》,嘉欣在故事中加入了互動性,靈感源自一次帶女兒去圖書館的見聞。「我見到有個小朋友用手劃本書,佢以為本書係好似熒幕咁郁得,我就諗點樣將書做到電子產品嘅互動性呢?所以喺《1到5》同《6到10》入面,我就加入shake shake本書三次、瞇埋眼吹一次等等嘅互動內容,畀家長同小朋友一齊玩,仲可以改變到書嘅走向。」

要培養小朋友的閱讀習慣,嘉欣認為身教最重要,她和老公袁劍偉也是愛書之人,她相信只要父母以身作則,孩子便自自然投入閱讀世界。「小朋友細個係透過模仿父母學習,所以屋企可以製造到閱讀氣氛係最好。爸爸睇好多書,包括好多教養書,我哋會一齊討論,喺教養書中學習啱我哋用嘅嘢。」父母愛看教養書,Kayla與Sofie則愛看所有童書,包括動物、漫畫、小發明及美術畫作等等。

親子閱讀要一心一意

親子閱讀是最佳親子活動之一,相信沒有人會反對,嘉欣同樣十分重視,絕不假手於人,閱讀時更需對小朋友一心一意。「你個人一定要喺度,同小朋友閱讀時你唔好玩手機或者忙其他嘢,小朋友係會記住同你嘅閱讀時間。」嘉欣希望家長可以與小朋友放下腳步,放慢生活節奏,盡量抽一本書的時間陪伴孩子。「我知道好多父母都好忙,只要用閱讀一本書嘅時間,同小朋友享受一下時光,已經係無價之寶。」

正如繪本系列的名稱《親親小團圓》,她希望家長可以從百忙之中, 利用一家人用餐的時間分享閱讀, 增進親子關係。「每本書後面嘅遊戲,希望家長可以放慢啲同小朋友玩。」

嘉欣身為一個演員,愛看故事更愛演故事,她每晚與女兒有Bedtime Story的時間,發揮演員媽媽的看家本領。「我好自然投入角色,呢個的確係我優勝之處,小朋友覺得故事有冇趣味,我讀得好唔好聽都爭好遠。」

姊妹愛玩角色扮演

Kayla和Sofie當然有遺傳媽媽的演戲天份,她們都愛玩角色扮演,而且演得投入,頗有說服力,最喜歡是扮童話人物。「有時我會扮白雪公主嘅後母賣蘋果,點知太逼真搞到大女差啲驚到喊,可能平時見到媽咪好善良,好少咁惡。」

兩個女又玩過養貓遊戲,Kayla叫妹妹Sofie扮貓,她們試過太入戲,Sofie「喵」得很兇惡,「主人」Kayla則投訴貓咪不乖,媽咪忍不住提醒她們是兩姊妹,不是主人與貓。這個真實趣事亦成為其中一本繪本《喵喵叫》的故事。

Kayla比Sofie大三年,自Sofie出世後,Kayla一直幫手沖涼換片,兩人亦睡在同一間房,上下碌架床,早已培養出濃厚的姊妹情。嘉欣稱Kayla享受做大姐姐,十分疼錫妹妹,「佢鍾意點阿妹做嘢,阿妹又聽佢點,不過妹妹都K2喇,有投訴家姐成日叫佢扮貓狗,哈哈!」當嘉欣聽到兩姊妹爭執,會忍著不干涉,讓她們自行處理,「千祈唔好咁早介入,如果唔係家姐以為你幫妹妹,妹妹又以為你幫家姐,事情就沒完沒了,我要畀佢哋自己學識點相處。」

家中具備素材隨時做手作

熱愛藝術的嘉欣不自覺感染了女兒,平日在家一齊玩手作,假日去逛美術館、藝術展,女兒十分喜歡,更培養出女兒一份修養。嘉欣解釋,藝術並不遙遠,只要入手不同素材放在家中,就輕易營造藝術環境。「屋企要時時刻刻有素材,例如畫紙、水彩或其他顏料、各式各樣嘅筆等等,可以隨時做手作。」

嘉欣從不讓女兒接觸電子產品,逢星期一至五亦不會看電視,所以她們會一起做很多小玩意,並培養出女兒不追求物質的價值觀。「我大女有個口頭禪:『媽咪等陣,我哋唔好買呢樣,睇吓返去做唔做到先!』如果我哋用手做得到,當中過程過癮好。」

最近女兒的蠟筆差不多用完,每支剩餘短短的,她們想出了方法把蠟筆換新裝,可以循環再用,嘉欣推介道:「我哋買咗英文字模同LEGO模,將啲太短嘅舊蠟筆放入模中溶埋一齊,攤凍後放入雪櫃,拎返出嚟就變咗全新嘅蠟筆喇!」

 

放學讓女兒發白日夢

當孩子入讀小學後,功課壓力隨之而來,父母不自覺催谷起來。縱使大女Kayla已升讀小一,嘉欣仍能處之泰然,放學沒有為兩個女安排補習班或興趣班,只陪女兒自由玩耍,由得她們發白日夢。「佢哋放學基本上無咩嘢做,所以玩嘅時間好多,甚至好多時間發白日夢,我覺得發白日夢好正,我由得佢哋安靜地周圍望,望吓天花板、用手指自己作故事。」走出戶外時,兩個女最愛赤腳攀爬。「赤腳對刺激感官比較好,因為腳板底有好多感覺,所以自小佢哋一去任何遊樂場,我就畀佢哋除鞋,對腦部、脊椎發展都比較好。」

升小一前,Kayla對開學感到焦慮,怕自己不適應小學生活,擔心老師會否好惡,但開學前嘉欣難以輔導,直到開學後Kayla見老師同學都很友善,便放下心頭大石,更驚訝爸爸媽媽的「功課」比她還要多!嘉欣笑說:「佢每日放學都畀好多紙我簽,又通告又手冊,話估唔到老師畀媽咪咁多『功課』,覺得好開心!」除了開學第一個月的適應期,嘉欣已放手讓Kayla自行處理功課,「我最多問佢做完功課未,佢話做咗,我就唔check㗎喇。」

對於多年來的湊女經歷,嘉欣不求女兒學會十八般武藝、成績科科A,只但求女兒健康快樂,將來能夠做喜歡的工作,而為人父母最重要給予孩子無限的愛。「每晚臨瞓前一定要了結唔開心嘅事,嬲嘅時候大家咩都講唔到,臨瞓前大家已經冷靜咗,比較容易溝通,我一定會呵返個女,其實媽咪好愛你。當小朋友感受到你嘅愛,就唔會淨係睇到你鬧佢咁表面,佢冷靜咗之後就會明白所有訓話背後,都係出自父母一份愛。」

小手作分享

1. 去掉蠟筆的紙。
2. 把蠟筆敲碎,放進矽樹脂模子。
3. 預熱烤箱250度
4. 蠟筆模子烤15分鐘
5. 取出,放涼,模子放進冰箱30分鐘,等凝固
6. 把蠟筆pop出來便可以啦!

*緊記,模子一定要墊著包錫紙的pan,不然難洗。

來源:林嘉欣IG

下一頁︰拒假手於工人 林嘉欣貼地湊女