【杞子肉碎洋葱炒蛋】

營養食材就好似雞蛋咁，一歲前都可能只會比蛋黃佢地食（因為蛋白容易令寶寶產生敏感），依家到囡囡都快要歲半啦，雞蛋已成為常用食材之一。

雞蛋含豐富的優質蛋白、氨基酸、其他營養素，如鉀、鈉、鎂、磷和鐵。

雞蛋營養咁豐富，大家當然都會煮比小朋友食，但聽到好多朋友講，每餐唔係烚蛋就只係會齋炒蛋，大人煮都煮到好悶，何況小朋友呢？

所以今次我教大家整個味道、顏色同營養都一齊「升呢」嘅炒蛋 – 【杞子肉碎洋葱炒蛋】，包保煮嘅興奮、食嘅開心！^_^

材料：

杞子・・・・1湯匙（用水浸軟，瀝水備用）

洋葱・・・・1/4個（去皮，切幼粒）

豬肉碎・・・30克

雞蛋・・・・1隻（用叉拂勻成蛋液）

熟軟飯・・・1碗

做法：

1）以中火熱鑊下少許油，下洋葱粒略炒，加入豬肉碎和杞子炒熟，將材料盛起備用。

2）同一鑊內加入少許油，下蛋液，然後加入已炒熟的洋葱、豬肉碎和杞子，以中火慢炒至蛋熟透，盛起，伴以熟軟飯食用。