港大陳偉霆

港大陳偉霆 – Jason Luk

article

廣告

其實個個星期都話呢個主角似邊個,都真係有啲悶!但係今次真係唔講唔得囉!Jason 話喺HKU,大家都只會叫佢做陳偉霆,已經冇人記得佢個名叫陸頌賢!睇真,佢個樣真係有7成似陳偉霆,不過佢身型高大啲,健型啲,加上一身健康膚色,另外嗰3成,就幾有C朗嘅味道啦!

Jason喺港大讀緊機械工程嘅Year 4,佢中學係讀九龍灣嘅聖若瑟英文中學(SJACS)嘅,高中嗰陣就去咗英國讀書,喺英國考高考,仲得到2A2B嘅成績,返嚟香港仲入到首選嘅學科,讀書運都算幾順架!

因為哥哥本身都係Model,所以Jason讀Year 1 嗰陣,就喺哥哥嘅介紹下開始接觸Model嘅工作,到而家都有4年啦,影平面、行catwalk、拍廣告,都已經試勻哂,所以同佢影相,都真係快靚正架!

除咗讀書同做Model之外,Jason都係一個泰拳助教,平時好鍾意做運動,佢話自己鍾意走運動型,陽光型嘅路線多啲! 同埋佢就比較抗拒做「小鮮肉」啦!如果有job要佢扮cute,佢情願唔接啦!因為同自己嘅性格差距太大喇!

Jason而家讀緊Year 4,不過佢打算延遲一年畢業,想把握時間,喺呢兩年建立多啲人脈關係,喺Model做出一番成績,搵到第一桶金,畢業之後就可以開公司,做生意。如果唔得嘅話,佢就會疊埋心水,向工程界進軍,希望可以做到工程承包商,總之就係想自己做老闆啦!

有留意「學界男女神」facebook專頁嘅,都應該有睇過Jason幫我哋拍咗兩條偽娛聞片,其中一條仲拖埋自己女朋友- 城大梁詠琪阿Kat一齊扮被偷拍tim。Jason話自己對拍片都好有興趣,希望呢兩年可以累積多啲演出經驗,豐富自己個履歷。

嚟到2015年,「學界男女神」都要增值吓,唔止要睇盡中學界靚人,仲要殺入大專界!

所以無論你係讀緊中學定大專,只要你認為自己或者身邊嘅同學仔有呢個資格,都可以自薦或推薦俾我哋! 由今期開始,成功自薦或推薦嘅話,仲有嘢送!

參加方法好簡單,只要將想推薦嘅同學,或者自薦勇士嘅facebook ,tag喺下面 “Comment”嘅位置;再將參加者及提名人嘅姓名、年齡、就讀學校、個人專長、聯絡電話,仲有一個月內影嘅近照兩張(全身及正面),喺Sunday Kiss facebook專頁 inbox或電郵到[email protected]俾我哋;如果成功通過編輯部審核,成為「學界男女神」,自薦或推薦者就可以得到由遵理學校送出嘅「$300課程現金券」。

「學界男女神」,等緊你嚟挑戰!

撰文: Joanne

攝影: 溫俊鏘

拍攝: Anthony Leong

美術:C.Ming

剪接: Candy

Hair+Makeup: EM Makeup

提供場地: ISSY MASON Cafe (2774 1008)

鳴謝:

贊助獎品

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。