夜宿鯨鯊館

率先試 夜宿鯨鯊館

article

廣告

「魚樂無窮」相信好多人都睇過,但真實版,我終於睇到喇!位於珠海的長隆海洋王國,在其地標鯨鯊館舉辦夜宿的體驗項目。上星期新華旅遊搞了全港首個 夜宿鯨鯊館 團,筆者隨團而上,與世界上最大的魚來個「同枕共眠」外,更要率先為大家披露夜宿實況!

 

撰文:Angela
攝影:Clay Lam

真實版魚樂無窮

兩日一夜的行程,首天午飯後,就入園自由活動,直至晚上8點半在鯨鯊館門前集合,準備紮營過夜。要在此夜宿,事前要簽夜宿協議書,規條是不能進入園內其他地區、保管好自己財物、確保自己身體狀況等,感覺好似玩笨豬跳時簽生死狀一樣,都幾搞笑!

鯨鯊館內有高8.3米、長39.6米的玻璃觀賞屏,主營地位於屏幕前的空地,不過,如果人數眾多,園方亦會開放弧型海底長廊位置。全館可放25個帳幕,每個帳幕最多可以瞓2大1細,不論浪漫二人行,又或者全家親子遊也可。

 

帳幕由園方提供,原先行程是安排夜宿者自行紮營,不過,可能怕人多手腳亂,到場時,已見多名工作人員神速地將帳幕set好,仲一排排擺放整齊,大家只要根據號碼「對號入營」。不過,入營時間雖然是9點,但館內的魚類需要休息,一般晚上9點半至10點,就會熄掉缸內大部分的燈光,如想拍照,謹記把握時間。晚上沒有甚麼活動,一切安頓後,就係坐在帳幕外,看着過千條魚及3條巨型鯨鯊在你面前游來游去,感覺海水變成夜空,魚兒變成星星一樣,超治愈!

翌日早上8點半開始導賞,工作人員會介紹魚類的生活習性及生態,同時會去頂層參觀水母培殖,小朋友仲可親手接觸水母,不過,原來培殖區位於園內禁區,只可看不能拍照。

 

夜宿配套設備點評!

平時去旅行住宿店,甚麼配套都有當然無問題,但今次是露營,行李如何安置,在哪裏沖涼都成重點。

露營裝備齊全 評分:*****(最多5* )

營幕很乾淨,表面有遮光布,不怕館內的燈光影響睡眠。另外,有地墊、睡袋、充氣枕頭、Led燈、椅子,就連電蚊拍都有預備,裝備齊全。

行李自費放儲物櫃 評分:**

兩日一夜的行裝可多可少,不想揹住行足幾個鐘,在入園後,可自費將行李存放在儲物櫃,每個櫃租40人民幣。另外,鯨鯊館不可拉喼入內,建議背包較方便。

充電位離營遠 評分:***

手機是香港人的生命,冇電就當然不可。幸好鯨鯊館內有十多個充電位可使用,但可惜不是營地能望到位置,所以要充電只有留守座位等,又或者放下外置充電池待它慢慢充。

沖涼行上幾層樓 評分:***

玩了整天,身水身汗,入到營後,園方會安排一部分營友整頓行裝,一部分先去沖涼。浴室位於館內的頂層,要行兩層樓梯先到,原為工作人員沖身使用,內有儲物櫃、風筒、洗頭水及沐浴露,園方亦會提供毛巾及牙擦牙膏。不過,淋浴間之間是磨砂玻璃,有一定的透視度,怕醜的要留意。

小食部有水供應 評分:**

晚上想食零食宵夜,可自行帶備,而館旁邊的小食部,雖然有飲品及杯麵賣,但十點左右就關掉,剩番冷熱水供應。

 

其他園內活動都要玩!

行程首天有近6小時自由時間,翌日早上離開營地後,亦有2小時自由時間繼續在園內玩,不用趕鴨仔。今次建議一些行程俾大家,有得睇有得玩,不過部分有指定時間,錯過了就可能要等下一輪。

 

 

珠海長隆海洋王國「夜宿鯨鯊館」、中山可可世界2天親子團
日期:10月8日
費用:成人$1,369起、小童$1,169起
查詢:2722 2888(新華旅遊)

延伸閱讀

澳門酒店 9大星級泳池大比拼

4大 澳門兒童樂園 推介