孕婦運動篇﹣游水

專欄

廣告

好多人都有疑問大肚後仲可唔可以做運動?亦有好多人認為做運動會容易流產,大肚婆最好唔好走動咁多,瞓係度多D就最好,其實呢一D觀念完全錯誤!!所以有好多人一有BB體重就直線上升,除左食得多,另一原因就係少運動!

首先解釋孕婦做運動有咩好處,根據臨床研究報告顯示,常運動既孕婦難產機率較小,產程通常較快,亦對產痛忍受力較強。亦有報告顯示,經常運動既孕婦對BB既行為同神經發育有正面影響,除此之外,做運動可以鍛鍊媽媽體能,所以可以減少懷孕過程帶來既不適(例如孕吐、腰背酸痛、水腫等)。

當然唔係每一種運動都適合孕婦,如果懷孕前已經有運動既習慣,就可以如常做之前既運動量,但注意唔好過量同選擇安全既運動。而冇經常運動既就應該揀一D輕量既運動,例如緩步跑、游水、固定式單車同散步,切忌太劇烈!每星期運動三次,每次最少20﹣30分鐘,不過最好都係諮詢跟進你既醫生係咪適合,因為有D孕婦如慣性流產、有高血壓或其他疾病就唔適合運動喇!

而我自己懷孕初期係多散步,到滿3個月就開始每星期游2至3次水直到而家,游水我認為對大肚媽媽係非常好既運動,除左安全亦較為舒服,因為陀B會令媽媽負荷增大,所以係水中媽媽基本係唔會因為BB而覺得辛苦,而每次游完感覺腰背都會放鬆左,如果唔識游水都可以係水中步行,去沙灘仲可以曬下太陽吸收維生素D添^^

不過到大概生B前一個月就盡量避免游水,原因係避免媽媽係水中穿羊水而唔知道,但個人認為都係問醫生意見最好!