微電影 《戀後…多少年》幕後花絮

拍微電影,對「 學界男女神 」嘅製作團隊,對兩位主角阿TomLucy嚟講,都係一次全新嘅挑戰。作品拍出嚟,當然希望得到大家嘅欣賞同支持,同時,我哋亦都好想將今次嘅創作,留低一個完整嘅紀錄,所以有一啲幕後嘅小故事,都想同大家一齊分享!

阿Tom同Lucy,都係有一定人氣嘅「 學界男女神 」,但係兩個都仲返緊學,所以淨係度期都幾花時間。加上Lucy中三起,就由女拔轉咗漢基國際學校,而家仲去咗杭州讀書,所以只可以趁佢放年假返香港嘅時候,為我哋嘅拍攝騰出兩日空檔。

喺表現經驗方面,阿Tom就唔及Lucy咁多,所以佢初初好驚自己會好緊張,同成日食NG架!不過佢勝在勤力,事前已經背熟哂個劇本,同埋都加咗好多自己嘅Idea去演,都幾抵讚架!

微電影片長只有5分13秒,不過我哋足足拍咗兩日,主要係因為第一日拍拍吓突然落雨,雖然雨勢唔大,但係就落極都落唔停,大大影響咗我哋嘅進度,而且Lucy喺兩日之後就要飛返杭州,所以大家都好心急!好彩Lucy都好體諒,亦都好想完成埋條片,就抽多一日時間畀我哋,最後先可以順利完成!

拍嗰陣其實都幾多搞笑嘢架!好似我哋去到赤柱美利樓對開嘅一個廣場拍緊戲,旁邊有好多強國旅客一邊圍觀,一邊大聲談論,不過因為係公眾地方,所以都冇辦法,唯有叫兩位主角大聲啲啦!

點知當阿導演一嗌”Action!”,有位大媽(紅圈者)竟然施施然行咗入鏡,仲要坐正喺兩位主角後面tim!我哋唔敢趕佢,就唯有咁多對眼一齊望住佢,等佢自己離開啦!好彩呢位大媽最後都好通情理,自己醒水行開咗!

而阿Tom最難忘嘅,就係拍籃球場嗰幕。當時佢要好嬲咁問Lucy:「係咪要分手呀?!」,同時喺球場裡面,就有一家五口打緊籃球。其中一個3-4歲嘅小女孩(紅圈者),以為兩個哥哥姐姐真係嗌緊交,受驚之下竟然攬住媽咪開始眼濕濕,雖然阿Tom覺得佢好慘,但係自己又要做戲,所以令佢好難忘!

除咗要多謝阿Tom同Lucy嘅演出之外,呢條微電影仲有一位好重要嘅靈魂人物,佢就係JW王灝兒喇 ! 因為Lucy係混血兒,講嘢始終有少少口音,而劇情又係以女主角嘅回憶出發,所以我哋設定成年版嘅Lucy都係混血兒同有口音嘅,加上JW首新歌 《多少年…》都同劇情好配合,雖然只係「出聲」,但係實在令條片增加咗唔少張力! 真架! 唔信睇多次丫! 哈哈~

聲音演出:JW王灝兒

主演:Lucy Stewart(邵晴)、Tom Ng( 吳俊欣)

撰文: Joanne

攝影: Anthony Leong

剪接: Candy

平面設計及調色: Ks

Hair+Makeup:EM Makeup

協力: Edison Chan、Fiona Fong

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。

讀者留言

更多精選內容