我要媽媽陪我

專欄

廣告

自從阿仔踏入4歲,再加上暑假既來臨,我發現我聽到:「我要媽媽陪我!」呢句說話既次數比以前高出幾倍!唔知各位做媽媽既朋友們,每當聽到呢句說話,你哋會有乜感受呢?

幸好我是雙職媽媽,可以自己安排時間陪佢。近排每日起床,第一句聽到就會係:「媽媽!起身呀!」起咗身之後就好快問:「我哋跟住做乜呀?」天呀?點解D小朋友一起身就要玩唔可以停一停架呢?其實加埋所有家中大小事務及公務,真係攰到不得了。

話雖如此,但其實我都係鐘意帶佢週圍去!踏入4歲,我發現可以帶佢去多咗好多地方!夏天更好就係可以帶佢去一齊游水!而且呢個係一個最好既親子活動,因為係相機同電話都唔可以帶入去,我可以好全情投入咁同佢玩,我係泳池見到佢既笑容係笑得最開心既!

另外,我見到有個暑期舞蹈班,見幾得意,咪去玩下,但唔係親子活動,呢個人一去到就係都唔肯自己同小朋友一齊跳,仲擺出一個好唔鐘意咁既款,但其他小朋友跳得好開心!點解呢?我最後問返佢,原來佢話D小朋友太細個(三歲同三歲半)﹣__﹣,返到黎考佢,其實佢係記得晒姐姐教佢既舞步,但佢再三話自己唔鐘意,所以呢樣我唔想迫佢,就無奈要放棄呢樣暑期活動!但其實個姐姐教得幾好架!如果唔係我考佢佢又點會記得?不過算喇!有D嘢係唔迫得既!

後來,無厘頭有一日突然覺得可以帶佢試下溜冰,於是約埋我個好朋友帶佢去溜,我哋笑言,兩個都識溜,係唔識玩花式姐,於是就走咗去玩!估唔到,佢竟然可以第一日就放開我既手自己試溜仲一D都唔驚!但我哋當然第一樣就係教佢點跌,如果唔係呢個好勝既小朋友一定話自己唔可以跌!好彩,佢都聽我哋話,仲好開心咁話要再去!咁樣睇住佢,我條腰同埋腳真係好攰囉!XD

由於呢個活動佢真係好鐘意同埋佢真心有興趣,於是我又安排咗個Trial比佢試下!第一堂佢表現好好,跟到老師教既,我相信佢好快可以唔洗再拖住我溜!希望佢學識後溜可以帶我溜喇!

今個暑假過得特別充實!全程時間要湊佢,加上公司既工作及家務,雖然好攰,但我覺得一切回憶都是快樂及美好的!最重要是多謝我家人及客人既體諒,讓我一切可以彈性處理:)